Заз чи бубайрин камаллу мисалар, абурал амал авун ва масабурузни абурукай ихтилат авун гзаф кIанда. Абур фадлай чи чIала ава, я куьгьнени жедач, я — къуватсузни. Бубайрин са мисалда лугьузвайвал, гьар са кардиз вичин кутугай вахт ава. За и мисал рикIел хкун дуьшуьшдин кар туш. ГьикI лагьайтIа исятда “Лезги газет” кхьидай вахт я. Ни и кар авунватIа, чеб сагърай, ни гьазурвал ийизватIа, пакадал вегьин тавуртIа, хъсан жеда. Газетдин чинилай “Лезги газет” — гьар са кIвализ!” гафар — эвер гун кIелай гьар са кас и кардик вичин пай, къуьн кутаз чалишмиш хьана кIанда.
…Гьуьрметлубур, эвер гун чун гьар сад патал я! Яргъал вегьемир. За и эвер гун акур пакадин юкъуз, Кьасумхуьруьн почтадиз фена, 2022-йис патал газет кхьена. Квитанция жибиндиз атайла, рикIиз регьят хьана.
Газет кхьиз фейи вахтунда почтадин кIвалахар идара ийизвайди тир Серьёза вахавай за газет кхьиниз талукь кIвалах гьикI кьиле физватIа, инсанар къвезвани, кхьизвани лагьана хабарни кьуна. Адан жавабдай малум хьайивал, “Лезги газет” кхьинив эгечIнава. ЦIийихуьряй тир Алисултанов Надир, Алхасов Небиюллагь, Курхуьрелай — Гьажиев Фердинанд, и цIарарин автор ва масабур сифте кьил кутурбур я. Санлай къачурла, сифтегьан кьве юкъуз “Лезги газет” — 20, амай газетарни журналар 30 экземплярдин кьадарда аваз кхьенва. Аквазвайвал, газетар кхьинал ва кIелунал рикI алай юлдашри “Лезги газет” — гьар са кIвализ!” эвер гунал амалзава. Багъри газет кхьинин рекьяй 1-чка хуьн патал чна вирида зегьмет чIугуна кIанда. Гьа и чIавуз чаз виридаз мад сеферда аферин къведа.
Райсудин Набиев
