Дагъустандин физический культурадин ва спортдин министрдин заместитель, боксдай Олимпиададин чемпион Гьайдарбег Гьайдарбегова садакай масадак акатдай коронавирусдин азардиз акси яз государстводи кьабулнавай серенжемрал амал авуниз, дагъустанвийриз кIвалерай экъечI тавуниз эвер гузва:
“Гьуьрметлу дагъустанвияр!
Къенин юкъуз чи вилик четин, агъур имтигьан ква. Коронавирусдин азарди саки вири дуьнья кьунва. Чи уьлкведин кьилевай ксари садакай масадак акатдай залан азардин вилик пад кьун патал лазим тир вири серенжемар кьабулнава ва и кар давамарзава. Дагъустан Республикадани, вири уьлкведа хьиз, физкультурадинни спортдин мярекатар, сборар, чирвилерин идарайра тарсар (ва икI мад) кьиле тухун акъвазарнава. Акъажунар тешкилунин, абур кьиле тухунин кIвалахни тайин тушир вахтарал вегьенва.
За и четин вахтунда виридаз сабурлувал хуьниз ва кьабулнавай серенжемрив жавабдарвилелди эгечIуниз эвер гузва. Квевай тIалабзавайди анжах сад я: лазимвал авачиз кIвалерай экъечI тавун, куь ва багърийрин сагъламвал хаталувилик кутун тавун. Мадни, гьар сада жуван михьивал хуьх, хсуси гигиенадин къайдайрал кIевелай амал ая!”
«Лезги газет»
