Гитлеран Германияди хабарсуз Ватандал гьужум авунин чIуру хабарди Советрин халкьарин рикIер къарсурна. ДатIана ракъинин нурарик квай ЯркIи дереда авай ЦицIигърин хуьруьн цавални чIулав цифер акьалтна.
Дяве башламишай сифте йи-къарилай эгечIна, и хуьряй фронтдиз жегьилар ва са кьадар яшар хьанвай итимар рекье гьатна. КIва-ляй са кас кьванни тефей хизанар сад-кьвед тир амайди. И жигьетдай заз кьетIендиз Абдуселимоврин хизандал акъвазиз кIанзава. Анай вад хцизни Яру Армиядин жергейриз эвер ганай.
Авай вад хвани рекье тур дидедин рикIикай, гьа арада ада вуч гьиссзавайтIа, лугьун четин я, амма викIегь дишегьлиди вири четинвилериз дурум гана.
Рекъият 1879-йисуз ЦицIигърин хуьре Давудов Давудан хизанда дидедиз хьана. Мирес Абдуселимов Абдуселимакай адаз уьмуьрдин юлдаш хьана. Дяведин йисара Рекъиятан вилерал нагъв кими хьанач.
1942-йисан сентябрдин вацра Абдуселимоврин гъвечIи хва Сефихан 3-группадин набут яз хтана.
1941-йисуз Бакудай армиядиз фейи хва Герейхан Владивостокдиз, анайни Керч шегьер немсерикай азад ийизвай батальондиз акъатна. Гьа и йисуз нубатдин гьужумда Абдуселимов Герейханан эрчIи кIвачел залан хер хьана. Са шумуд сят вич-вичик квачиз амукьна.
Немсер кьулухъ элкъвейла, батальондикай чан аламай аскерри мейитар кIватIдайла, Абдуселимов Герейханал чан аламайди акуна ва ам ППГ-диз хутахна. Духтурри адан эрчIи кIвач метIелай агъуз хьиз атIана. Хирер сагъар хъийиз саки са йис госпиталда хьана.
1944-йисуз 1-группадин набут Абдуселимов Герейхан ватандиз рекье хтуна.
Кьве хва дяведин цIаярай хтанвайтIани, Рекъият дидедин рикI секин тушир. Дяве куьтягь хьана. Пуд хва дяведай элкъвена хтун тавур дидедин вил гьамиша рекьел алай. Ада умудар квадарзавачир. Рекъият дидеди лугьудай: “Зун йифиз партал аламаз къаткизва, зи аялар хтана ракIарихъ галамукь тавурай лагьана, тадиз рак ахъайдайвал”. Вахтар физвай, амма Рекъият дидеди умудар квадарзавачир. Гуьгъуьнлай малум хьайивал, адан пуд хвани гел галачиз квахьна. ЧIехи хва Абдуселимов Гьасан 1942-йисуз, Абдуселимов Исакь 1942-йисан сентябрдин вацра ва Абудуселимов Мисриханни 1942-йисан июндин вацра.
Умудар кьилиз акъат тавурла, накъварай ацIанвай вилер рекьел аламаз, Абдуселимова Рекъият 1973-йисан 13-январдиз 94 йисан яшда аваз рагьметдиз фена ва ам Агъа СтIал-Къазмайрал ЦицIигърин сурара фаракъатнава. Къуй вичиз Аллагьди рагьмет гурай. Амин!
Ватандин чIехи дяведа иштиракай, азадвал, аслу туширвал патал чанар къурбанд авур ватанэгьлияр рикIел хкун, абурун кьегьалвилер несилрилай несилралди агакьарун чи везифа я.
Тегъи Мегьамедов
