РД-дин экономикадин ва мулкар виликди тухунин министерстводи республикадин “Чкайрилай теклифар” проект уьмуьрдиз кечирмишун давамарзава. Алай йисуз конкурсда 84 проект гъалиб хьанва.
“Чкайрилай теклифар” конкурсда неинки муниципальный районри ва шегьердин округри, гьакI республикадин хуьрерини (шегьерри) иштиракзава. Санлай къачурла, проектда иштиракун патал алай йисуз 192 арза атана.
“Чкайрилай теклифар” проект Дагъустанда уьмуьрдиз кечирмишиз им кьуд лагьай йис я. Адан бинеда чкайрин самоуправленидин органриз ва агьалийриз жемиятдин къурулушрихъ галаз алакъалу виридалайни хциз акъвазнавай месэлаяр гьялиз куьмек гун ава.
Проектдин кьилин шартI ам кьилиз акъудун патал муниципальный тешкилатдин бюджетдай, гьакIни меценатрин такьатрин гьисабдай финансар чара авуникай ибарат я.
ИкI, 2021-йисуз проект кьилиз акъудун патал республикадин бюджетдай тахминан 200 миллион манат, муниципальный бюджетрай — 48,3 миллион манат, меценатрин патай 51,5 миллион манат серфнава.
Проектар республикадин 31 муниципалитетда уьмуьрдиз кечирмишда. Планрик футболдин гъвечIи майданар туькIуьрун, аялрин бахчаяр, хуьрерин культурадин кIвалер, библиотекаяр, музеяр бинедилай ремонт авун, аялар къугъвадай майданар, паркар, сейр ийидай чкаяр, спортдин объектар, рекьер туькIуьрун ва аваданламишун, куьчейра эквер ва целди таъминардай сетар цIийи хъувун ква. Вири объектар алай йисан эхирдалди кьилиз акъудна куьтягьда.
«Лезги газет»
