Чаз кхьизва
Гьуьрметлу «Лезги газетдин» редакция! Квез и чар кхьизвайди Бут-Къазмайрал яшамиш жезвай, яхцIурни цIуд йисуз аялриз чирвилер ва тербия гайи, алай вахтунда ял язавай Явер муаллим я. За виликдай «Коммунист», гила «Лезги газет» кхьиз ва кIелизни гьикьван йисар я. Гьелбетда, хайи газетди, гуьзгуьдай аквазвай хьиз, жемятдин уьмуьрдин, адан ирсинин, ватанпересвилин, сиясатдин, хайи чIалан, хуьруьн майишатдин, медениятдин, эдебиятдин, образованидин, медицинадин, спортдин, гьакIни са жерге маса месэлайрикай хабар гузва, меслятар къалурзава. Чун, газет кIелзавайбур, и кардилай гзаф рази я. Амма газетдин чинра чаз халкьдин яшайишдикай, кимивилерикай, тIал-квал алай маса месэлаяр тIимил чапзавайди хьиз аквазва. Лезги халкьдиз кьегьалар, ватандихъ рикI кузвай инсанар, игитар, агалкьунар, хъсан кIвалахар аватIани, кимивилерни авачиз туш.
Гьахьтин месэлайрикай яз, лугьуз жеда: хъвадай ва дигидай яд бес тахьун, хуьрера яргъал йисаралди ишлемишзавай, куьгьне хьанвай, кьадардин ток тагузвай ва кIвалера авай холодильникар, телевизорар ва маса техника къайдадикай хкудзавай трансформаторар, мал-къара хуьдай чилер — цIудралди гектарар кьилдин ксарив кирида вугана, хуьруьнвийри, аялриз нек хьуй лагьана хуьзвай калери машинрин рекьин къерехар кIвачелай авун ва икI мадни.
Шегьеррикай рахан тийин, хуьрерани, зирзибилдин иесивал тежез, рекьин къерехар, яд гузвай къубуяр, гьатта «Самур-Дербент» къанални кваз, зирзибил вегьез, кьацIурзава. Ахьтинбуруз туьнбуьгьни тийиз, инсанар вагьши хьанва. Виликдай, гьарда вичин кIвалин, салан патав къуй эгъуьнна, къубудин яд алцифарна хъвазвай, ишлемишзавай. Чаз диде-бубайри тикрардай: циз тфу вегьин гунагь я, яд михьи затI я. Гьинава гила а насигьатар?
Ихьтин месэлаяр гзаф ава. Заз тIал алай мад са кардикай лугьуз кIанзава. Гьелбетда, тамара, кул-кус квай чкайра виликдайни вагьши гьайванар, чакъалар туьш жедай. Амма гила, Самур, Приморск хуьрерилай гатIумна, Муьгъверганрал кьван чакъалрин кьадар акьван гзаф хьанва хьи, абурун къувдин гъиляй нянилай экв жедалди инсанар икрагь хьанва. Абур гьатта цурриз, демекриз гьахьиз, цицIибар, верчер, уьндуьшкаяр тухузва. Гьатта рагъ алай юкъузни чакъалар куьчейра, салара гьалтзава. Абуру инсанрал, аялрал вегьей дуьшуьшарни ава. Чакъалрин кьадар артух хьун, инсанри лугьузвайвал, Оружба хуьруьн мулкара къушчивилин чIехи кархана кардик акатун я. Анай акъудзавай, гадарзавай амукьаяр, кьейи цицIибар, верчер, лазим къайдада терг тавуна, еке гьамбарриз элкъвенва. Къвалав гвай хуьрера нидин гъиляй яшамиш хьун четин хьанва. Гьа амукьаяр себеб яз, чакъалрин гъиляй инсанар икрагь хьанва. Бес азарар-тIегъуьнар пайда хьайитIа, халкьдин гьал гьикI жеда?!
Заз кар алай мад са месэладикай лугьуз кIанзава. Алай йисуз футболдай «Динамо» команда Россиядин кьилин лигадиз акъатнава. Им Дагъустандин еке агалкьун я. ТIалабзава газетдиз, футболдай хсуси корреспондент тайинарна, макъалаяр, турнирдин таблица, «Динамо» командадикай малуматар акъудун. За фикирзавайвал, икI хьайитIа, «Лезги газет» кхьизвайбурун кьадарни артух жеда.
Умудзава хьи, газет кIелзавайбуруни чпин фикирар, меслятар газетдиз ракъурда, талукь органри и месэлайриз фикир гуда ва серенжемарни кьабулда.
Явер Агьмедов,
Бут-Къазмайрин хуьр
