ЦIийи ктабар

Махачкъалада «Лотос» издательствода Абдулафис Исмаилован «ЧIехиди яргъай аквада» («Большое видится на расстоянии») ктаб акъатнава. Им газетдин кIвалахдиз вичин уьмуьрдин 50 йис гайи чи тIвар-ван авай журналистдин ирид лагьай ктаб я. Ада дагъус­танвийрин рикIелай чеб алат тийидай Мегьамедсалигь Гусаевакай ва Загьир Аруховакай документрин бинедаллаз «Шаг в бессмертие» ва «А жизнь продолжается» телефильмаярни гьа­зурнай. Алай вахтунда А. Исмаилова «Лезги газетдин» хсуси корреспондентвиле кIвалахун да­вамарзава.  

Автордин цIийи ктабда­, амай вири дуьньяда хьиз, Да­гъустандани чеб чпихъ галаз акьалтI тийир бягьсина авай гьахълувиликайни нагьахъвиликай, инсанри датIана гуьзлемишзавай хъсанвиликайни гьич са къанундални амал тийизвай писвиликай ихтилат физва. И ихтилат Дагъустан абадвилихъ фидай рекьер ачухзавай рес­публикадин кьил Сергей Алимович Меликованни адан командадин вилик чIуру ниятар авай къуватри кьасухдай арадал гъизвай четинвилерикай ва абур арадай акъудуникай я. Соцсетра чка кьазвай бинесуз хабарризни фитнейриз жаваб Сергей Алимовичанни адан командадин, ва санлай къачурла, вири чи халкьдин чIехи ва гьакъикъи кIвалахар, чпин кьадар къвердавай артух жезвай агалкьунар я. И къени кIвалахар яргъалди амукьда, пичIи хабарарни фитнеяр къе-пака виридан рикIелай алатда.

«ЧIехиди яргъай аквада» ктабда А. Исмаилова «Лезги газетдин» сайтдиз акъуднавай макъалаяр гьатнава. Ам РД-дин Халкьдин Собранидин депутат М. Алиярован куьмекдалди акъуднава. Ктабдикай алава информация «Лезги газетдин» редакциядай къачуз жеда.

Телефонар: (872-2) 66-00-60, 8(988) 430-16-54.

Чи мухбир