Хуьрек тухудай вахт

Куьсридал ацукьнавай­ Чуь­х­вер Магьсудаз салам гайи Ху­да-Вердидин гуьгьуьлар шад­завай.

— Гьиниз я вун, хуьруьнви?

— Сурарал.

— Ана вуч ава эхир?

— Бес рагьметдиз фейи Мавлудиназ сур эгъуьнзавачни ана?

— Эгъуьнрай ман. Вун гьи патахъай абурухъ галаз алакъалуди я? Ваз теклифай кас авани, вун а рекьяй устIар яни?

— Эй, Чуьхвер Магьсуд, ваз чиз­вай са затIни авайди туш. Исятда сур атIуз­ва­й­буруз хуьрекар, эре­кьар­ тухудай вахт я. Гьавиляй за гадайрал са кьилни элязавайди я.

ДатIана хъвазва

Куьчедай агъуз хквезвай Худа-Вердиди, акъваз тийиз, са низ ятIани экъуьгъзавай. Гьаятдал агакьайла, ада Чуьхвер Магьсудаз салам гана ва ам атана кьуьзекан патав ацукьна.

— Ви цIапарик акьван цIай кутурди вуж я эхир? — жузуна къуншиди.

— Вуж жеда кьван, я балаяр сагъ хьайи кас, и чи духтурар лугьудай гьарамзадаяр. Я рикIиз кьей къунши, заз эрекь-чехир хъвамир лугьуз, чпи лагьайтIа, югъди-йифди хъвазва…

Нариман Ибрагьимов