Алай йисан 25-январдиз Дагъустан Рес­публикадин Кьил Сергей Меликова са шумуд сятда ачух эфирда дагъустанвийрин 35 суалдиз жавабар ганай. Инсанри иллаки яша­йишдиз, кIвалах жагъуруниз, медицинадиз, аялрин месэлайриз, коммунальный къуллугъриз талукь суалар ганай. Лугьун лазим я хьи, агьалийрик секинсузвал кутазвай саки вири месэлаяр гьялдай рекьер жагъурна.

ИкI, меркездин агьалийриз ва мугьман­риз Махачкъаладин аэропортуниз физ-хкведай автобусрин маршрут кардик кутуна­. Мер­кездин Ю.Акаеван тIварунихъ галай куь­чеда авай 9-нумрадин кIвалин гьаят аваданламишна.

Туристрин кьадарни гзаф хьайила, Дербентдиз фин-хтун четин хьанвай. Инсанри и кардикайни рикIел гъанай. Гила Махачкъаладай Дербентдиз кьуд сеферда поездар физва. Пассажиррини разивалзава.

Республикадин Кьиливай яшайишдин­ кIвалерин къулайвал хъсанарун, набут ая­лар герек дарманралди таъминарун, кIва­лиз газдин линия гъун патал куьмек тIа­ла­бай инсанрин къайгъуни авуна. Вири чпин мурадрив агакьна.

Гила региондин Кьили 29-ноябрдизни ачух эфирда мад республикадин агьалийрин суалриз жавабар гана. Им важиблу серенжем я.

Чи мухбир