Зарпанддин кьил алатнавай, ООН-дин истемишунрал, теклифрал амал тийизвай Израилдин кьушунри «жегьеннемдиз» элкъуьрнавай чкадай катдай чкадал гъанвай инсанрин кьадар гзаф я. Израилди (далудихъ США галайвиляй) гьабурузни саламат чкадиз фидай ихтияр гузвач. Гьа и пара четин вахтунда Россиядин дипломатри талукь къуллугърихъ галаз тешкиллувилин зурба кIвалах тухвана. КIуьд вишелай виниз россиявийрикай ирид вишев агакьна дишегьлияр, аялар дяведин цIайни-гум, бомбаярни гуьллейрин хар авай чкадай Египетдиз ахкъудна. Россиядин МЧС-дин самолетри абур ватандиз хкана.
Дяве физвай чкадай катзавай инсанрин гьакъиндай РФ-дин Президент В.Путина икI лагьана: «Катзавайбуруз куьмек гун важиблу, баркаллу кар я. Чаз ана гьихьтин гьалар аватIа аквазва. Гьавиляй чи пак тир везифа абуруз куьмек гун я. Чавай куьмек 900-далай виниз инсанри тIалабна. Абурукай 639 Россиядин агьалияр, 271 касни абурун мукьва-кьилияр я».
КIеве гьатнавай инсанриз куьмек гуз Дагъустанни гьазур я. РД-дин Кьил Сергей Меликова лагьайвал, Дагъустанди катнавайбурукай 200 кас кьабулда ва абуруз яшайишдин вири шартIар тешкилда.
Дагъустандин Гьукуматдин Председатель Абдулмуслим Абдулмуслимова къейд авурвал, Палестинадай катуниз мажбур хьанвай инсанриз «Леззет» санаторийда чка гуда. Сифтегьан 50 кас атанва. Санаторийда абур патал къулай шартIар тешкилнава. Идалайни гъейри, патав Манас поселок гва, ана школа, аялрин бахча ава. Чкаяр бес тахьайтIа, катайбур «Дельфин» мугьманханадини кьабулда.
Республикадин регьберди малумарайвал, катдай чкадал атанвай инсанрин гьакъиндай къайгъу чIугвадай кьилдин десте тайинарнава, РД-дин Гьукуматдин Председателдин заместитель Рамазан Жафаров кьиле аваз. Дестедик республикадин талукь са шумуд министерстводин векилар ква. Дагъустандиз къвезвай инсанар сагъламвилин жигьетдай ахтармишун патал медицинадин къуллугъчийрин дестени гьазурнава. Гьар са министерство, идара чпиз талукь месэлайрал машгъул жеда. Катнавайбур ахтармишда, вакцинация ийида, абурун дережа (статус) тестикьардай документар гьазурда, ашкъи авайбур кIвалахдалди таъминарда, аялрив школайра кIелунар давамариз тада, начагъбур больницайра эцигда…
Палестинада дяведин гьерекатрив эгечIай гьа сифте йикъалай дагъустанвийри адан агьалийрин тереф хуьзва, абуруз куьмек гудай рекьер жагъурзава. Дяве себеб яз катуниз мажбур хьанвай ислягь агьалияр кьабулун, инсанриз яшайишдин къулай шартIар тешкилун регьимлу, Аллагь рази жедай кар я. Дяведин гьалар куьтягь хьана, Палестинадин агьалийриз чпин кьилдин, садалайни аслу тушир государство жедай югъ мукьвал хьурай.
Нариман Ибрагьимов
