12-июндиз Дербент райондин Белиждин хуьре Россиядин Югъ шад гьалара къейдна. Мярекатда Дербент райондин администрациядин кьил Мавсум Рагьимова, депутатрин собранидин председатель Мажмутдин Семедова, РД -дин Халкьдин Собранидин депутат Эрик Ибрагьимова, райондин кьилин заместителар тир Садир Эмиргьамзаева, Икрам Бабетова, общественный палатадин председатель Фетулла Фатуллаева, управленийрин ва отделрин начальникри, хуьрерин администрацийрин кьилери, депутатри, карханайрин ва идарайрин руководителри, школайрин ва аялрин бахчайрин директорри ва масабуру иштиракна.
Шад мярекат Россиядин Федерациядин Гимн тамамаруналди гатlунна. Ахпа сегьнедиз экъечlай “Виктория” квартетди “Россия” мани устадвилелди лагьана.
Мярекат ачухай Мавсум Рагьимова Россиядин Югъ чи уьлкведа кьилин сувар тирди къейдна.
— Россиядин Югъ, — давамарна ада, — им чи чlехи, гзаф миллетрин уьлкведин гьар са агьалидин сувар, Ватандин алатай, алай ва гележегдихъ галаз алакъа гьиссзавайбурун суварни я.
Россиядин тарих чи гьар садан тарих я ва ам чи гъвечlи ватандилай башламиш жезва. Ватандин абадвал, гьайбатлувал патал адаз чи гьар садан хъсан крар, кlанивал, вафалувал, гьакъисагъ зегьмет герек я. Заз районэгьлийрихъ мягькем сагъламвал, хушбахтвал хьана кlанзава.
Мажмутдин Семедова, Фетулла Фатуллаева ва масабуру виридаз сувар тебрикна, гьар садан кlвале бахт, берекат, булвал хьун алхишна.
И юкъуз, адет хьанвайвал, 14 йис тамам хьанвай жаванрив паспортар вахкана. Россиядин гражданар хьанвайбур Белиж хуьруьн школадин аялри кьуьл авуналди тебрикна.
Идалай гуьгъуьниз кьиле фейи концертда Дербентдин музыкальный училищедин “Виктория” квартетди, Белиж хуьруьн школадин жаван артистри, манидар Эждар Мамедова, Дагъустандин операдинни балетдин театрдин солистка Диляра Агъаевади ва масабуру иштиракна.
Мярекат аялри “Зи Россия” флешмоб авуналди акьалтlна.
Къагьриман Ибрагьимов
