Къе, неинки уьлкведин экономикадиз, агьа­лийрин дуланажагъдиз ва алагъ-салагъдиз таъсирзавай, гьакIни санлай инсандин уьмуьр ва сагъламвал хаталувилик кутазвай­ коро­навирусдин тIугъвалдин девирда, чи медикри ийиз­вайди халис игитвал я. Ковиддик азарлу хьанвай инсан къутармишун патал абуру, чпин сагъламвални уьмуьр хаталуви­лик кутуналди, инсан ажалдин къармахрай акъудзавай дуьшуьшар авачиз туш. Заз абуруз вилиз таквадай гзаф хаталу душмандихъ (тIугъвалдихъ) галаз юкъузни, йифизни женгина авай фронтовикар лугьуз кIанзава. Эхь, рикI гваз, вири къуватар эцигна кIвалахзавай медикар чи вири шегьеррин, районрин духтурханайра ава. Чпиз баркалла!

Амма азарханайра, ковиддин госпиталра,­ махсус отделенийра кIвалахзавай духтуррилай (гзаф-тIимил лугьун тийин) нарази­вилин гафарин ванерни къвезва, гьа гьисабдай яз — Дербент шегьердин медикрилайни. Им аламат жедай кар туш, азарлуяр гзаф ава, духтурар, лувар квайбур хьайитIани, агакь­завач. КIа­раб квачир як жедач лугьудайвал, “лацу халатар” алайбурун жергейрани къайгъусузбур, авачиз туш, гьа гьисабдай яз — Дербент шегьердин духтуррин арадани.

Къейд авун герек я хьи, вичиз Кьиблепатан Дагъустандин меркез лугьузвай Дербентдин азарханадиз (ЦГБ) кьиблепатан районрайни четин гьалдиз аватай азарлуяр рекье твазва.

Гьайиф хьи, чIуру хабарар фад чкIида. Бя­зи вахтара инсанри, авай гафунихъ авачир сад-кьведни гилиг хъувуна, а хабар гуьгьуьлар мадни гзаф чIурдайди ийида. Ковиддик азарлубур сагъар хъувунин, вакцинация­диз талукь месэлани гьа икI я. Эхир хьи, бязи вахтара азарлуйрин патай агакьзавай наразивилер бине авайбурни жезва. Ихьтин арза-ферзедикай за Дербентдин ЦГБ-дин кьилин духтур Девлетхан Мирзехановаз хабар гана. Ада вуч аву­натIа, гьихьтин серенжемар кьа­булнатIа, агъадихъай аквазва…

Кьилин духтурдихъ галаз рахай кьве йи­къа­лай за коронавирусдик азарлу хьанвай  дербентви Мирзеханов Мегьамедаз зенг хъувуна. Ингье ада вуч лагьанатIа.

— Накь, пакамахъ заз Девлетхан Турабовича зенг авуна. Хабарар кьуна. За жув ва зи уьмуьрдин юлдаш ковиддик азарлу тирди, медикрин къайгъусузвилерикай ихтилатна. Кьилин духтурди лагьана хьи, вичи “исятда, духтурар кIватIна, совещание тухузва, виридаз ван къведайвал, телефондин сес артухарда, къуй Куь наразивилерикай гьабурузни чир хьурай”. За жуван ихтилат давамарна. Идалай гуьгъуьниз кьилин духтурдин заместителди ва маса духтурри зенгер авуна, пулсуз гузвай дарманарни хтанвайди, абур зав чпи агакьардайди гьуьрметдивди, къайгъудар тегьерда лагьана.

Разивилелди къейд ийиз кIанзава хьи, алай вахтунда, медицинадин ахтармишунри къалурзавайвал, Мегьамед Мирзеханов ва адан уьмуьрдин юлдаш, сагъ хъхьанва. Духтурар абурув гзаф дикъетдивди эгечIзава.

Амма и вакъиада зи фикир а кардал желбна хьи, кьилин духтурдиз, арзачидихъ телефондай вичи яб акална, гьакъикъат чирун тIи­мил акуна. Ада вири духтурриз санлай чпин кIвалахдиз азарлуйри гьихьтин къимет гузватIа, абурун чпин мецелай ван атун таъсирлу яз гьисабна. Ам ягъалмиш хьанач. Гьакъикъатдани, гьакI я: вири алай чкадал, халкьдин вилик лагьай гафунин къуват чIе­хиди, жавабдарвал арадал гъизвайди жезва. Чаз аквазва хьи, республикадин регьбер Сергей Меликован кIва­лахдиз гьа и тегьер хас я. Ада чиновникар халкьдин вилик жаваб­дарвиле твазва. Сергей Алимовича жемят чиновникрин къуллугъда ваъ, чиновникар жемятдин къуллугъда авайди, эвелимжиди жемят тирди кардалди къалурзава. Дербентдин ЦГБ-дин кьилин духтур Девлетхан Мирзеханов Дагъустандин регьбердин кIвалах­дин тегьердилай чешне къачуз чалишмиш жезвайди аквазва. Жавабдар къуллугърал алай вири ксарин кIвалахдин тегьер гьа ихьтинди хьанайтIа, чи крарни вижевайдиз вилик фидай, уьмуьрни хъсан жедай.

Абдулафис  Исмаилов