Дагъустан Республикадин Кьилин везифаяр вахтуналди тамамарзавай Владимир Васильева коррупциядихъ галаз женг чIугунин рекьяй комиссия цIийи хъувуна. Идан гьакъиндай малумат РД-дин Кьилин махсус сайтда эцигнава.
ЦIийи комиссия 32 касдикай ибарат я. Адан кьилени Владимир Васильев вич акъвазнава. Комиссиядик акатзава: Дагъустан Республикадин Гьукуматдин Председателдин заместителрин везифаяр вахтуналди тамамарзавай Р.Алиев, Р.Жафаров, РД-дин Кьилин ва Гьукуматдин Администрациядин руководитель В.Иванов, РД-дин Хатасузвилин Советдин секретарь А.Абдулмуслимов, РД-дин карчийрин ихтиярар хуьнин рекьяй векил М.Далгатов, коррупциядиз аксивал авунин месэлайрин рекьяй управленидин начальникдин везифаяр вахтуналди тамамарзавай И.Ибрагьимов, РД-дин госкъуллугърин кадрийрин месэлаяр гьялзавай управленидин начальник А.Исрапилов, РД-дин юстициядин министрдин везифаяр вахтуналди тамамарзавай Х.Пашабегов, РД-дин Кьилин ва Гьукуматдин Ад-министрациядин сад лагьай управленидин начальникдин везифаяр вахтуналди тамамарзавай А.Халилов.
Комиссиядин къурулушдик гьакI общественникар, ведомствойрин, республикадин регионрин, бизнесдин, государстводин идарайрин векиларни, гьа гьисабдай яз, “Поддержка курса Главы РД” ДРОО-дин, ФНС-дин управленидин, РД-да авай УФАС-дин, РД-дин Общественный палатадин руководителар А.Абдуразакьов, У.Жабраилов, К.Къубасаев, А.Мачаев, ДГУ-дин ректор М.Рабаданов кутунва.
Комиссиядин виликан составдив гекъигайла, цIийидак РД-дин финансрин, хуьруьн майишатдин ва суьрсетдин министерствойрин, РД-дин Муфтиятдин векилар акатнавач.
Россияда ва гьакI Дагъустандани коррупция лап хци месэлайрик акатзава. И мукьвара Дагъустанда дуьньядин глобализациядиз талукьарна кьиле фейи илимдинни тежрибадин международный конференциядин са секциядал къейд авурвал, жегьилри экстремизмдиз, терроризмдиз, радикализациядиз кьил ягъунин дибдин себебрикайни сад коррупция я.
«Лезги Газет»
