РФ-дин МВД-дин теклифдалди дарда авай хизанрай тир школьникриз куьмек гун патал кьиле тухузвай “КIелиз физ куьмек це” вирироссиядин серенжем Дагъустанда 1-августдилай гатIуннава ва 15-сентябрдалди давам жеда.
Серенжем РД-дин МВД-ди РД-дин образованидинни илимдин министерстводихъ галаз санал кьилиз акъудзава. Кьве ведомстводин къуллугъчийри аялар мектебриз гьазур хьунин гьалар ахтармишнава. Къенин юкъуз материалрин куьмек гуниз ва герек затIар (дафтарар, къелемар…), парталар, кIвачин къапар къачуниз талукь сиягьдик 511 аял кутунва.
“Гад акуна-такуна акъатзава. Гила диде-бубаяр чпин аялар кIелунин цIийи йисаз гьазурунив эгечIзава. Аял мектебдиз гьазурун жавабдар ва гьа са вахтунда харжияр истемишзавай кар я. Гьар са хизандихъ ахьтин мумкинвилерни жезвач. Гьар йисуз тешкилзавай и серенжем важиблуди я”, — къейдна РД-дин образованидинни илимдин министерстводин векил З.Самедовади.
ТIвар кьунвай хъсан серенжемда муниципальный тешкилатрин кьилери, карчийри ва общественный деятелрини активвилелди иштиракзава.
«Лезги газет»
