30-июлдиз Мегьарамдхуьруьн райондин кьил Фарид Агьмедов Кьибле Кореядай атай туристрин дестедихъ галаз гуьруьшмиш хьана. Идакай «Лезги газетдиз» райондин администрациядин пресс-къуллугъди хабар гузва.
Шад гьалара кьиле фейи гуьруьшдин вахтунда мугьманри чеб районда, республикада хьайивиликай, чкадин гьаларикай чпин фикирар лагьана. Абур са шумуд юкъуз Мегьарамдхуьруьн райондин халкьдин яшайишдихъ, адетрихъ, итижлу затIарихъни чкайрихъ галаз таниш хьана. Кьибле Кореядай атай туристри райондин агьалийрин мугьманпересвилел, милли хуьрекрал иллаки гьейранвална. Туристрин дестедин кьиле авайди Ким я, адахъ гьар йисуз чи ерийриз мугьман хьунин фикир ава.
Райондин кьил Ф.Агьмедова мугьманриз жуьреба-жуьре ядигарар, райондикай кхьенвай ктабар пишкешна. Эхирдай мугьманри Кореядин халкьдин кьуьлерни къалурна.
«Лезги газет»
