Зун и макъала кхьиниз алай йисан 30-майдиз “Лезги газетдиз” акъатай Мерд Алиди редакциядин тапшуругъдалди чапнавай “Бязи тIварар ахъа хьайила…” макъалади мажбурна. Гьуьрметлу шаирди зи рикIел гзаф йисар идалай вилик хьайи хер сагъ хъхьуниз куьмекна — макъала зи лукьмандиз элкъвена. Килиг садра, яшар 90 йисалайни артух хьанвай муаллим Музафар Таймуршагьовича гьикьван кIанивилелди вичин хайи хуьруькай — Чахчарикай тарихдин макъала кхьиз-ватIа, чпел дамах авуниз лайихлу рухваяр рикIел хкизватIа. Амма адан тариф, гьуьрмет авуниз лайихлу кIвалах-дал хъен гъун, заз чиз, дуьз туш. За а касдиз чухсагъул лугьузва. Ада кхье-на, амма туьнбуьгьрик акатун патал ваъ. Туьнбуьгьзавай ксари муаллимди кьун тавунвай тIварар чпи раиж хъувунвайтIа, макъала кхьена, редакциядив ахга-кьарнайтIа, хъсан жедай.
2013-йисуз Украинада яшамиш жезвай лезгийри “Зи хуьр” конкурс малумарнай. Адаз талукь яз “Хуьрер хуьх, инсанар!” рубрикадик кваз “Лезги газетдин” чи лезги хуьрерин тарихдикай макъалаяр акъатиз башламишна. Зани жуван хайиди тир КIелетрикай (Докъузпара район, Къалажух хуьр) тарихдин макъала кхьенай. А чIавуз КIелетдал яшамиш тежезвайди фикирда кьуна, за, а вахтунин девир къалур тавуна, анжах тарихдикай кхьена. Макъала 2013-йисан 14- ноябрдиз “Лезги газетдиз” “Ви къула зи рикI ама” кьил алаз акъатна. Куьне зун айибмир, хайи хуьруькай мад сеферда кIел хъувурла, зи гьевес хкаж хьанай. Амма макъала зи “салаз аватдай къванер” галайди хьана. Бязибуру зи рикIел гьатта дидеярни хкана…
Эхирдай заз чир хьайивал, за макъалада хуьре авачир аялрин бахча, бес тежезвай хъвадай яд, хуьряй экъечIзавай чIуру гьалда авай рехъ, куьгьне хьанвай мектебдин дарамат къалурнавачир. Макъала тарихдиз талукьди тирла, а ихтилатар адан манадив кьазвачирла, за хуьруьн хци месэлаяр гьикI къалурдай кьван?!
Вири савадлу я, кхьихь ман куьнени газетриз макъалаяр.
Абдул Ашурагъаев
