19-ноябрдиз РД-дин Гьукуматдин Председатель Абдулмуслим Абдулмуслимова гъвечIи аялрин арада кьиникьрин кьадар артух хьунин месэлаяр веревирд авун патал республикадин медицинадин идарайрин кьилевайбурухъ галаз совещание тухвана.
Премьер-министрди гъвечIи аялрин арада кьиникьрин кьадар гзаф хьуни виридак къалабулух кутазвайди ва ам яшайишдин жигьетдай еке метлеб авай месэла тирди къейдна.
А.Абдулмуслимован гафаралди, арадал атанвай гьалар къайдадик кухтун патал жавабдар вири идарайри тади ва менфятлу серенжемар кьабулна кIанзава. Кьилин месэла здравоохраненидин сифтегьан (первичный) звенодин (иник амбулаторийринни поликлиникайрин хилен вири медидараяр акатзава) ва кIвачел залан дишегьлийрин сагъламвилел гуьзчивал тухузвай духтурханайрин кIвалах зайифди хьунихъ галаз алакъалу я.
А.Абдулмуслимова Дагъустандин духтурханаяр, иллаки яргъал районра авайбур, пешекарралди бес кьадар таъмин ятIа тайинарун патал ахтармишунар кьиле тухун буйругъна. Идахъ галаз санал медидарайра кIвалахзавай духтуррин пешекарвилизни къимет гудайвал я.
«Дагъустандин здравоохраненидин министерстводи кIвачел залан дишегьлийрин сагъламвилел гуьзчивал тухузвай идарайрин ва аялар хазвай кIвалерин кIвалахда дегишвилер тун лазим я. Къе ихьтин гьалар гьам министерстводи, гьамни кьилин духтурри бес кьадар фикир тагунин нетижада арадал атанва. Им умуми жавабдарвал я. ГъвечIи аялрин арада кьиникьар пара хьунин жигьетдай тахсир агьалийрик кутун ва я и кардиз маса себебар жагъурун герек туш», — къейдна А.Абдулмуслимова.
Гегьеншдиз РД-дин Гьукуматдин сайтдай кIелиз жеда.
Агьмед Магьмудов
