14 процентдин
Дагъустанда гьасилзавай балугърин кьадар 9 вацран къене саки 14 процентдин гзаф хьанва. Идакай «Дагъустандин экономика» телеграм-каналди хабар гузва.
Чешмеди, РД-дин Гьукуматдин Председатель Абдулмуслим Абдулмуслимован гафарал асаслу яз кхьизвайвал, балугъар гьасилунал машгъул майишатри 2024-йисан январь-сентябрь варцара 6,7 агъзур тонн балугъар чIехи авунва.
Гьа са вахтунда чешмеди рикIел хкизвайвал, 2023-йисан 9 вацран къене республикада 5,9 агъзур тонн балугъар гьасилнай. И делил фикирда кьурла, алай йисуз и рекъем 13,6 процентдин виниз акъатзава.
ГьакIни къейдзавайвал, 2024-йисан январь-сентябрь варцара, санлай къачурла, цин биологический ресурсар кьунин кьадар 22 агъзур тонндикай ибарат хьанва, абурукай 20 агъзур тонн каспийскдин килкайрал ацалтзава.
ТIимил хьанва
Махачкъаладин гьуьлуьн портуни 2024-йисан январь-октябрь варцара пар ичIирунин кьадар 8,1 процентдин — 2,7 миллион тонндал кьван тIимиларнава.
Чешмеди къейдзавайвал, гьа са вахтунда Каспийскдин бассейндин гьуьлуьн портари, санлай къачурла, (суммарный) пар ичIирунин кьадар (грузооборот) 6,9 миллион тонндикай ибарат хьанва (+5,4 процент). ГьакIни хабар гузвайвал, «цадай» парарин кьадар (наливные грузы) тIимил хьунин рекъем 10 процентдилай алатнава.
Гьа са вахтунда чешмеди гъизвай делилралди, къунши Астрахандин гьуьлуьн портуни алай йисан 10 вацран вахтунда 3,3 миллион тонн пар ичIирнава. Къейдзавайвал, им, алатай йисан и муддатдив гекъигайла, 4,2 процентдин гзаф я.
РикIел хкин, виликдай «Дагъустан» РИА-ди Махачкъаладин гьуьлуьн алишверишдин портуни 2024-йисан сифтегьан ругуд вацра пар ичIирунин кьадар, алатай йисан и муддатдив гекъигайла, 4,3 процентдин тIимиларнавайдакай хабар ганай.
Чешмеди къейд авурвал, «Морцентр-ТЭК» тешкилатдин малуматра гъизвай делилралди, алай йисан январь-июнь варцара портуни пар ичIирунин умуми кьадар, санлай къачурла, 1 миллионни 611 агъзур тонндиз барабар хьанва. Алатай 2023-йисан сад лагьай зур йисуз и рекъем 1 миллионни 684 агъзур тонндикай ибарат тир.
Гьазурайди – Муса Агьмедов
