Силисчияр гъалатI хьайила…
Силисдин кIвалахдин гъалатI себеб яз, Китайда са итим 23 йисуз дустагъда ацукьна. Идакай Asia One чешмеди хабар гузва.
50 йисан яшда авай Цзинь Чжэхунак инсан яна кьинай тахсир кутунвай. 30-ноябрдиз судди тахсир субутзавай делилар бес кьадарда гьахълубур туширди яз гьисабна, Цзин дустагъдай азад хъувуна.
1995-йисуз Китайдин Гирин вилаятдин ракьун рекьин сергьятра 20 йисан яшда авай дишегьлидин мейит жагъанай. Са вацралай 27 йисан яшда авай Цзинь, адал шак финалди дустагъна. 1996-йисан ноябрдиз вилаятдин судди Цзиназ кьиникьин жаза гунин къарар акъудна. Ихьтин серенжем малумарайдалай кьулухъ кьве йис алатайла, кьиникьин жаза, адет яз, гьамишалугъ дустагъда тунин жазадалди эвеззава.
Дустагънавайдан адвокатди къарардилай наразивална, гьикI хьи, силисдин кIвалах тухудай вахтунда Цзиназ азабар гана. Гьавиляй китайви квачир тахсир хиве кьуниз мажбур хьана.
Уьлкведин са газетдиз и тахсиркарвал ахтармишуникай макъала акъатайдалай кьулухъ 2014-йисуз судди делодиз мад сеферда килиг хъувун кьетIна. 2018-йисан мартдиз судди субутдин делилар гьакъикъибур яз кьабулиз тежедайдакай малумарна.
Къадагъа эцигнава
Украинадин Херсонский областдинни Крымдин сергьятдал Россиядин ватандашар патал къадагъадин серенжемар кардик кутунва. Идакай УНН чешмеди малумарзава.
Ихтилат «Чаплинка», «Каланчак» ва «Чонгар» КПП-рикай физва. «Алай вахтунда гьахьдай ихтиярар гузвай пунктари РФ-дин ватандашар патал тамамвилелди кIвалахзавач. Анихъ фидайлани, анихъай инихъ хкведайлани, къадагъа кардик кутунва», — лагьана Гордеева. Украинадин агьалияр лагьайтIа, кьве патазни са манийвилерни авачиз ахъайзава.
Сергьят эцигунин месэлаяр Керчдин проливда арадал атанвай гьаларихъ галаз алакъалу тирди тестикьарнавач. Идалай вилик малумарайвал, Минскдай самолетда аваз Украинадин сергьятриз физвай россиявияр ахъайзавачир.
США-дивай яракьар къачуда
США-дини Саудовский Аравияди ракетайриз акси THAAD комплексар маса къачунин гьакъиндай икьрар кутIуннава. Идакай CNBC чешмеди малумарнава.
Саудовский Аравиядиз США-дивай тIвар кьунвай жуьредин 44 яракь маса къачуз кIанзава. Чешмеди къейдзавайвал, кьве уьлкведин арада кьиле физвай савдадин къимет 15 миллиард доллардиз барабар я. «Ракетайриз акси THAAD комплексар маса гун – им США-дини Саудовский Аравияди хатасузвилин рекьяй санал кIвалахунин карда важиблу кам жеда», — малумарна чешмеди.
Д.Трампа къейд авурвал, журналист Джамаль Хашкуджи кьейидалай кьулухъ арадал атай чуьруькдизни килиг тавуна, США-ди Саудовский Аравиядихъ галаз санал кIвалахун давамарда. «Эгер чна ахмакьвилелди алакъаяр чIурайтIа, и кардикай Россиядизни Китайдиз еке менфят жеда», — лагьана Трампа.
Депутатрин теклиф
Россияда улакьрин аварияр (ДТП) хьайи дуьшуьшра чкадилай чуьнуьх хьайибурун жавабдарвал кьезиларун мумкин я. Идакай «Новости» РИА-ди хабар гузва.
РФ-дин КоАП-дин 12.27-статьядин 2-паюна къалурнавайвал, алай вахтунда ДТП арадал атай чкадилай катайбур са йис — йисни зуран муддатда улакь идара ийидай ихтиярдикай магьрумзава ва я административный къайдада 15 суткада кьван дустагъзава.
ЛДПР-дин фракциядин депутатрин дестеди Госдумадиз гъанвай законопроектдалди, мумкин тир жазайрин сиягьдик вад агъзур манатдин жермени кухтун теклифзава. И проектдик кьил кутунвайбурун гафарай, авария хьайи чкадилай чуьнуьх хьунай бязи дуьшуьшра эсиллагь тахсир квачир инсанриз жаза гузва. ИкI, ДТП арадал атай чкадал аламукьзавай са иштиракчиди ГИБДД-дин къуллугъчийриз эверна, тахсир квачир кьвед лагьайди гуя чуьнуьх хьанва лагьана, гьадаз жаза гуз тазва.
Идалай вилик, 22-ноябрдиз, малумарайвал, МВД-дин теклифдалди, рулдихъ бязи дарманар ишлемишун ички квай ва я бейгьуш хьтин затIар ишлемишунихъ галаз барабар авун мумкин я.
Тахсир чпинди яз…
Украинадин президент П.Порошенкоди малумарнавайвал, Россиядиз гуя Азовдин гьуьлуьн районда авай Украинадин шегьерар гужуналди кьаз кIанзава. Идан гьакъиндай «Новости» РИА-ди хабар гузва.
«Россияди Украинадин чилер дяведалди къачунин ниятрилай гъил къачузвач. Москвадиз, Мариуполь ва Бердянск гужуналди къачуналди, дяведалди къакъуднавай Донбассдай дяведалди къакъуднавай Крымдиз рехъ ачухиз кIанзава», — лагьана Украинадин кьили.
Адан фикирдалди, и кардин гьакъиндай гуя Керчдин проливда арадал атай чуьруькдин гьалари шагьидвалзава. Украинади Россиядиз Крымдиз фидай «кьураматдин дегьлиз» гуя гужуналди къачуз кIан хьунин къаст авайдакай са шумудра малумарна. Алатай йисан октябрдин вацра Украинадин генерал-лейтенант И.Романенкоди къейд авурвал, ихьтин гьерекатар кьилиз акъудун патал Россиядиз 40 агъзур аскердикай ибарат дестеяр герек жеда.
Канабрай экъечIна, рекьяй физвайдан кьил хана лугьудайвал, П.Порошенкодин, тахсир вичинди яз, масадал тIуб туькIуьрзава, гьалар вичи махсусдаказ къизгъинарзава.
Къейд ийин, Киевдинни Москвадин арада алакъаяр 2014-йисан вакъиайрилай Крым Россиядик ахкахьайдалай кьулухъ пис хьана.
Гьазурайди — Куругъли Ферзалиев
