ФЛНКА-дин президент, миллетрин арада алакъайрин жигьетдай РФ-дин Президентдин патав кардик квай Советдин член Ариф Пашаевич Керимоваз РФ-дин Хатасузвилин Советдин “Милли хатасузвал таъминарунин карда лайихлувилерай” медаль ганва.
А.П.Керимоваз шабагь гунин гьакъиндай буйругъдал Хатасузвилин Советдин Секретарь Николай Патрушева къул чIугунва.
Къейд ийин хьи, 2018-йисуз А.П.Керимов РФ-дин Президентдин Разивилин чарчиз лайихлу хьанай.
Ариф Керимова ФЛНКА-диз ам арадал гъайи 1999-йисалай регьбервал гузва. 2012-йисалай чи ватанэгьли миллетрин арада алакъайрин жигьетдай РФ-дин Президентдин патав кардик квай Советдин член я. ФЛНКА-ди асул гьисабдай халкьарин арада ислягьвал, дуствал мягькемарунин, хайи чIал, адетар хуьнин, акьалтзавай несилриз ватанпересвилин тербия гунин жигьетдай кIвалах кьиле тухузва. Идара неики са чи уьлкведа, гьакI адалай къецепатани машгьур я. Къейд ийин хьи, ООН-дин Экономикадин ва Яшайишдин Советдин патав ФЛНКА-дихъ консультативный махсус дережа ава ва ам международный са шумуд тешкилатдин член я.
Ариф Керимова 2021-йисуз “Национальное возрождение” тIвар алай фонд арадал гъана ва адан регьбервилин везифаяр Токай Арифович Керимова тамамарзава. Гаф кватай чкадал къейд ийин хьи, и фондуни “Лезги газетдин” редакциядин дегьлиз цIийикIа туькIуьр хъувун патал саки 1 миллион манатдин кьадарда аваз пулдин такьатар чара авуна.
“Лезги газетдин” редакциядин коллективди Ариф Пашаевичаз и агалкьун рикIин сидкьидай мубаракзава ва адахъ сагъламвал, кIвалахда мадни еке агалкьунар хьана кIанзава.
«Лезги газет»
