Уьмуьрдин четин шартIара гьатнавай етим аялриз куьмекар гунай аялрин кIвалерин ва интернатрин тIварунихъай Мегьарамдхуьруьн райондин кьил Фарид Агьмедоваз жемиятдин яшайишдин «Къени гъилер» милли премия гана.
«Лугьуда хьи, инсаният вилик фин ва абадди хьун гзафни-гзаф сада садаз куьмекдин гъил яргъи авунин нетижа я. ИкI яни, тушни тарихчийри чирда. Са кар якъин чида: чна сада масадаз куьмек гузмай кьван гагьди чун къуватлу я. Куьн лагьайтIа, чIехи руьгь ва къени рикI авай инсан я», — ихьтин гафар кхьенва «Къени гъилер» центрадин директор Дмитрий Цаура Фарид Агьмедоваз ганвай дипломдал.
ЧIехи конференциядал шабагьар вахкудайла, Д. Цаура Дагъустандин Кьил Сергей Меликован, Халкьдин Собранидин, Дагъустандин Гьукуматдин ва Махачкъаладин мэрдин тIварарихъ Чар кIелна. Адан гафар умудлувилив ва етим аялрин уьмуьр хъсанариз чалишмиш хьунив ацIанвай. Фарид Агьмедова «Къени гъилер» центрадиз — жемиятдин виридалайни зайиф къат тир етим аялриз — гьар йисуз еке куьмекар гузвайди, идалди ада халис инсанвилин ва уьмуьрда жавабдарвилин чешне къалурзавайди къейдна.
— Фарид Загьидиновичан крари чпиз кьетIен фикир гун истемишзава. Гьар йисуз райондин кьили аялрин кIвалера ва интернатра авай етим аялриз яр-емиш рекье твазва. Идалди Ф. Агьмедова неинки материальный рекьяй куьмек, гьакI диде-бубадин къаюмвиликай хкатнавай аялрив хайи чилин вири няметар агакьарзава. Абурун уьмуьр гуьрчегариз ва хъсанариз чалишмиш жезва. Фарид Загьидинович хьтин ксар авайвиляй чавай етим аялрин гележег хъсанди хьуник умуд кутаз жеда. Ахьтин ксари яшайишдин хилек кутазвай пай неинки кьилдин идарайриз куьмек гун, гьакIни санлай вири уьлкведин гележегдин къайгъударвал авун я. Чна Фарид Загьидиновичаз рикIин сидкьидай сагърай лугьузва! Адан кар чаз чешне я ва ада гражданвилин активный позиция къалуруниз куьмекзава, — лагьана ада.
Конференция яшайишдин институт вилик тухуниз ва етим аялриз куьмек гунин месэлаяр веревирддай майдандиз элкъвена. Адан иштиракчийри чпин тежрибадикай суьгьбетна, четин месэлаяр санал гьялун патал чпихъ авай теклифар, меслятар раижна.
Мярекатди Дагъустанда чIехи ва къени рикIер авай ксар гзаф авайди, умуми макьсаддал — аялриз куьмек гунал — гьалтайла, жуьреба-жуьре пешейрин ва яшайишдин дережайрин инсанар санал кIватI хьуналди, четин месэлаяр арадай акъудиз алакьдайди къалурна.
Чи мухбир
