Инсанриз информация гьамиша герек я. Журналистика неинки дуьз малуматар агакьардай къайда, гьакIни вичин жуьредин муаллим я лагьайтIани жеда. СМИ-риз кьуд лагьай гьукум гьавайда лагьанвач эхир. Журналистар чпин аудиториядив талукь тир фикир агакьариз алахъзава ва гьа идалди инсанар дуьньядиз килигзавай тегьердиз таъсирзава.
Инсанриз кIелиз итижлу тахьунин тахсир вуч я? Зи фикирдалди, виликрай инсанри ихтибарзавай, чпихъ инанмиш тир бязи СМИ-ри гьакъидихъ гузвай, гьакъикъиди тушир малуматар чапзава. Ихьтин кардиз рехъ гузвай СМИ-яр инсанриз кIелиз ашкъи амукьдани? Са рахунни алачиз — ваъ. Абуру чпин авторитет кIвачерик вегьезва. Амма гьахълу делилар чапдани, тапанбур лагьай суалдиз жаваб гьар са журналистди вичи гузва эхир.
Гьелбетда, ихьтин дуьшуьшар себеб яз халисан журналистикадикай кьил къакъудун дуьз туш. Четин девирда ам мичI алудзавай экуьнин нур я.
Намуслу журналистар — гьакъикъи делилар агакьарзавайбур, жемиятдин жуьреба-жуьре месэлайрай кьил акъудиз куьмек гузвайбур я. Гьа ихьтин пешекарар себеб яз, чаз дуьньядин экономикадин базарда, международный алакъайра, илимда, культурада, образованидин хиле вучтин гьалар аватIа чир жезва.
Инал заз къейд ийиз кIанзава хьи, журналист, инсанрив гьахълу гьакъикъат агакьарун патал, гзаф акьуллу, дерин чирвилер авай пешекар хьун лазим я.
Зун журналистика эбеди, гьамиша герек пеше яз хьунал кIусни шаклу туш. Вучиз лагьайтIа, инсанри дуьньяда жезвай крариз ийизвай итиж садрани тIимил жедач, ам йикъалай-къуз гена артух жезва.
Чун яшамиш жезвай общество гьикьван вилик фенватIа, гьакьван гзаф крариз итиж ийизва инсанри. Гьар юкъуз майдандиз цIийи-цIийи шейэр, хилер акъатзава. Журналистди лагьайтIа, абурукай хабар гун, гъавурда тун лазим я. Фикир гузвай ксарин кьадар гьикьван гзаф хьайитIа, гьакьван еке лазимвал, игьтияж арадал къвезва пешекар журналистдин.
Журналистика галачиз садазни масадан ван къведач. Инсандин зигьиндив агакьарун — ингье гьа им я и кIвалахдин макьсад — инсанрин рикIера гьиссер арадал гъун, абурун руьгьдик цIай кутун.
Зун рикIивай инанмиш я хьи, журналистика чаз къенин юкъуз ва гележег патал иллаки герек я. Инсанар дегишариз, абуруз умудар гуз жедай пеше. Кьилинди намуслуди хьун я.
Самур Азимов, ДГУ-дин студент
