ЦIийи гьар са йис алукьайла виринра: карханайрани, майишатрани, кьилдин ксарини алатай йисан нетижаяр кьун, гележегдин планар ягъун адетдин кар я. “Лезги газетни” кьулухъ акъвазнавач. Йисан нетижаяр кьадайла, чна суалар гузва: “Гьихьтинди хьана ам чи редакция патал? Гьихьтин цIийивилер ва дегишвилер арадал атана? ЦIинин йисуз кIвалахдив гьи тегьерда эгечIун герек я?…”. ИкI, 2-нумрада чна 2020-йисуз спортдин майданра кьегьалвилер къазанмишай спортсменрин сиягь раижна, газет кхьинин кардик къуьн кутурбуруз сагърай лагьана.
Къе лагьайтIа, чаз редакциядиз мукьвал-мукьвал макъалаяр рекье твазвай, важиблу месэлаяр къарагъарзавай ва къиметлу теклифар гузвай, чкайрал алай чи “вилерни япар” тир мухбирриз, кьилди къачуртIа, К.Казимоваз, Къ.Акимоваз, А.Эсетоваз, О.Гьуьсейноваз, Аб.Исмаиловаз, А.Агьмедагъаеваз, А.Къардашаз, С.Ибрагьимоваз (Махачкъала), Лга Энвераз, Н.Мамедоваз, Р.Эминоваз, Гь.Агацарскийдиз (Ахцегь район), С.-А.Абдурашидоваз (Рутул район), И.Жаватоваз, Ш.Багъироваз, А.Эмирсултановаз, С.Сулеймановаз (Докъузпара район), Н.Насруллаеваз, А.Абдулгьамидоваз, Ф.Абасовадиз, Т.Салмановадиз, С.Пашаеваз (Мегьарамдхуьруьн район), С.Саидгьасановаз, М.Абдулмуталибовадиз, Х.Кьасумоваз, В.Жамалдиноваз, Р.Набиеваз, А.Камиловаз, Н.Шихнабиеваз, Э.Сайдумоваз, А.Мирзалиевадиз, Ш.Ризаевадиз (Сулейман-Стальский район), А.Семедоваз, А.Рамазановадиз, С.Шагьпазоваз, Ф.Мегьамедовадиз (Кьурагь район), Э.Багъишеваз, А.Мирзебеговаз, С.Абилаз, Э.Загьирбеговадиз, Гь.Гьуьсейноваз (Дербент), А.Ашурагъаеваз, Р.Велибеговаз, А.Рамазановаз, Э.Ашурагъаеваз (Хив район), Гь.Къазиеваз, Ш.Хидироваз (Хасавюрт район), М.Куьревидиз, Б.Эскендероваз (Москва), Н.Агьмедовадиз (Астрахань) ва хейлин масабуруз (виридан тIварар кьунвач) алукьнавай ЦIийи йис рикIин сидкьидай тебрик авуналди, сагърай лугьуз кIанзава.
Абурун макъалаяр авачир чи газетдин са нумрани авач лагьайтIа, чун ягъалмиш жедач. Авайвал хиве кьуртIа, виликан са шумуд йисав гекъигайла, йисан эвел кьиляй чи мухбиррин активвал зайиф хьанвай. Амма датIана газетдихъ галаз алакъа хуьзвай ксари чун чпихъ муьгьтеж яз яргъалди тунач…
Сир туш, алатай йис чи виридан уьмуьрда четинди хьана. ТIугъвалдин шартIара газет кьецI тагана чапдай акъудиз алакьнатIани, им четинвилерал расалмиш хьанач лагьай чIал туш. Кьилинди, гьар гьафтеда, гьар садан кIвализ газет агакьарна. Заз лугьуз кIанзава: им вири коллективди, гьакIни самоизоляциядин къайдадал амал авуниз мажбур хьанвай чи къуллугъчийри хьиз, чкайрал алай къелемдин чи дустарини гьакъисагъвилелди зегьмет чIугунин нетижа я. Газетдин гьар са нумрада чна коронавирусдиз талукь яз республикада, уьлкведа ва дуьньяда арадал атанвай гьаларикай макъалаяр, малуматар гана ва и кар къенин юкъузни давамарзава. Газетдин “суфрадал” залан тIугъвалдихъ галаз женг чIугвазвай ксарикай — алай аямдин игитрикай, тIал алай месэлайрикай макъалаяр гъана. Дидед чIалал акъатзавай газет саналди гьазурдай мумкинвал хьунал чна шадвалзава.
Инанмишвилелди мадни а кардикай лугьуз кIанзава хьи, газетдин къуват мухбиррилайни гзаф аслу я. ГьикI хьи, чкайрал кьиле физвай дегишвилерикай, цIийивилерикай хьиз, къалабулух кутазвай месэлайрикайни, рехъ гузвай татугайвилерикайни кхьиналди, чахъ галаз сих алакъа хуьналди, абуру чаз — редакциядин коллективдиз — зурбаз куьмекзава. Чкайрилай къарагъай, халкьдик къалабулух кутазвай месэлаяр, абуру рекье твазвай суалар гьич садни редакциядин къуллугъчийри фикир тагана тазвайди туш.
ЦIийи йис алукьун — им гьар са касди гележегдихъ, рикIе авай мурадар кьилиз акъудунихъ вегьезвай нубатдин цIийи кам я — “Лезги газетдини” цIи 101-йисаз кам вегьенва. Инлай кьулухъни чун халкьдин къул къени ийиз алахъда. Гьелбетда, чаз чкайрилай кхьизвай чи ватандашрин куьмекдалди. Къуй 2021-йисуз виридахъ сагъвал, кIвалера берекатарни хушбахтвал хьурай!
Яшайишдин ва чарарин отдел
