14-мартдиз Махачкъалада, Р.Гьамзатован тIварцIихъ галай милли ктабханада, машгьур журналист, чи ватанэгьли Алик Абдулгьамидован «Зи вахтунин кьегьаларни йиртижияр. Алай аямдин уьмуьрдин тарих» («Герои моего времени и варвары. Хроника современной жизни») цIийи ктабдин презентация кьиле фена. Къейд ийин хьи, им автордин къелемдикай хкатнавай вад лагьай ктаб я.
Мярекатдиз республикадин жемиятдинни сиясатдин деятелар, алимар, журналистар, студентар атанвай. Гзафбуру цIийи ктабдикай, Алик Абдулгьамидован алакьунрикай чпин фикирар лагьана, автордихъ чандин сагъвал, мадни еке агалкьунар хьун алхишна.
Ктаб асул гьисабдай кьве паюникай ибарат я. Сифте паюна авторди, уьмуьрда гьикьван агъур имтигьанар гьалтнатIани, акIаж тахьай, кьил агъуз тавур, чеб акьалтзавай несилар патал халис чешнейриз элкъвенвай инсанрин кьисметрикай ихтилатзава. Кьвед лагьай паюна, дагъустанвийрихъ авай месэлайриз, дердийриз талукьарна, журналистди кьиле тухвай ахтармишунар гьатнава.
«Ктабдин игитрикай бязибур чи арада амач, гзафбуру къенин юкъузни уьмуьр давамарзава. И ктаб кхьидайла, захъ авай макьсад сад тир – акьалтзавай несилриз, зи кьатIунрай, низ гьуьрметна, нелай чешне къачуна, нин гаф гьисаба кьуна кIанзаватIа чирун. Ахьтинбур и ктабда 22 кас ава», — лагьана Алик Абдулгьамидова, цIийи ктабдин кьетIенвилерикай рахадайла.
Авторди абурукай бязибурукай куьрелди суьгьбетни авуна. Мисал яз, гьеле 80-йисара сиясатдин майданра пайда хьайи Вазиф Мейланов, колхоздин председатель Мегьамед Чартаев, журналист Загьир Арухов, летчик Камил Моллаев ва масабур.
Къейд ийин хьи, Алик Абдулгьамидов уьлкведа машгьур журналистрикай сад я. Ам РФ-дин гьукуматдин, «Золотое перо России» премийрин ва маса шабагьрин сагьиб я.
Агьмед Магьмудов
