“Лезги газетдиз” РД-дин Кьилин пресс-къуллугъди хабар гайивал, Олимпиададин резервдин “Самур” тIвар алай спортшкола Украинада кьиле физвай махсус серенжемда телеф хьайи Рамиз Рашидован тIва­ру­нихъ янава. Талукь Указдал республикадин Кьил Сергей Меликова къул чIугуна.

Рамиз Рашидован бине Мегьарамдхуьруьн райондин Тагьирхуьруьн-Къазмайрин хуьряй я. Ватандин вилик хивевай буржи кьилиз акъуддайла, къалурай кьегьалвилерай аскердиз телеф хьайдалай кьулухъ “Жуьрэтлувиляй” орден ганай.

РикIел хкин, “Лезги газетдин” алай ­йисан нумрайрикай сада Рамиз Рашидован уьмуьрдин ва женгинин рекьикай ­мухбир Абдулафис Исмаилова кхьенвай “Игитви­лелди” тIвар алай макъала акъат­най.

24-февралдиз Украинада махсус серенжем га­тIун­на. 25-февралдиз — Рамиз Ра­­­шидован сад лагьай ва гьа са вах­тунда эхиримжи женг кьиле фенай. Юлдашри ри­кIел хкизвайвал, тапшуругъ кьи­лиз­ акъудиз фидай рекье ада абурук руьгь кутун патал­ лагьана: “Квез ки­­чIе жемир, гада­яр. Чна абур шу­пIар­да. Куь ху­руйрал орденарни медалар жеда. Зи тIвар­цIихъ за вердишвилер къачур чи спортзал ягъун­ни заз бес я”. Ибур рикIе Ватан хуь­нин къаст авай кье­гьал хцин эхиримжи гафар тир.

Агьмед Магьмудов

________________________________________________________

Чи телеграм-каналдик экечI — «Лезги газет»