Чи халкьари Донбассда кьиле физвай вакъиаяр рикIе тIарвал аваз, къала­булух кваз кьабулна. Ингье йисалай гзаф вахт алатнава Россияди Донбасс азад авун патал махсус серенжем тухуз. Луганскдин ва Донецкдин республикайрин агьалийриз талукь яз цIийи фашистри ийизвай вагьшивилер акъвазарна кIан­зава. Президент В.В. Путина и кардин патахъай икI лагьанай: «Россиядин вилик акъвазнавай мес­эла чеб урус халкьдин ва культурадин пай я лугьузвайбурун тереф хуьн, абуруз даях хьун я».

Ватан кIеве гьатайла, чаз гьамиша викIегь, алакьунар авай регьберар Худади гузва, кьис­­мет жезва. Им чи халкьдин еке бахт я. Эгер 1941-1945-йиса­ра гьукуматдин кьиле И.В.Сталин хьа­начиртIа, завай дуьньядин гьалар гьикI жедайтIа лугьуз жедачир. Къенин юкъузни чаз Аллагьди викIегь, камаллу, бажарагълу Пре­зидент ганва.

Алай вахтунда садрани тахьай жуьреда жегьилриз гьам тIвар-ван авай ­полководецар, гьам чпин хуьруьнвияр, шегьерэгьлияр идеалар хьиз къалурна кIан­да, жуван гъвечIи ва чIехи Ватандал дамах ийиз жедайвал.

Якъин я, Россиядин цIийиз арадал­ атанвай республикайрин тереф патал,­ абуруз куьмек гун патал агъзурралди контрактникар, запасда авайбур гуьгьуьллувилелди фенва. ГьикI хьи, чаз сад тир тарихдин, культурадин, руьгьдин девлетар ава, чун советрин девирдин уьмуьрни акур инсанар я. Гьар са кIвале Гитлеран Германиядихъ галаз дяве авур бубаяр авай. Гзафбуру къизгъин женгера чпин чан эцигна. Чаз, гзафбуруз, фашизмдин кьил атIайди, тум хкудайди хьиз хьанай. Эхь, фашизм дувулрай терг­на кIан­завайди тир. Гила шухевичрални бандерачийрал чан хтанва, абуру ва фашист идеологияди Украинадин «миянлу» чилел мад дувулар ягъ хъувунва.

Серенжемда Дагъустандин кьегьалрини гьунарлувал, чпин эркеквал къалурзава. Чахъ игитар гзаф ава. Гьайиф хьи, бязибурув гьукуматдин шагьабар те­леф хьайила агакьзава, абурун хизанрив вахкузва. Гьукуматди ахьтин хизанар текдиз тадач, чнани абурун игитвилер рикIелай ракъурдач.

Мегьарамдхуьруьн райондин ЦIийи­­­­хуьряй, виринрай хьиз, Донбассда­ гзаф­ контрактникарни гуьгьуьл­лу аскерар­ ава. Абуру чпин викIегьвал, игитвал­ гьар ­юкъуз къалурзава. Махсус ­се­­ренжемда зи дустарини танишри­ иш­ти­ракзава. Гьабурукай садни­ зи дуст Нуриев Лаймон Резмиевич я­. Ам 1984­-йисуз дидедиз хьана­. ЦIийи­хуь­руьн мектебдин­ 9-класс акьалтIарай гада Дагъустандин­ промышленно-эко­но­мический колледж­дик­ экечIна. Дип­лом къачур йисуз ам армиядиз физва.­ Гуьгъуьнлай Лаймо­на ДГТУ-да кIелун давамар хъийизва. 2005-йисалай жегьилди­, контрактник яз, Каспийскдин фло­ти­лия­да къуллугъзава­. Адахъ офи­­цер хьунин­ мурад авай. 2015-йисуз Санкт-Пе­тер­бургда чирвилер­ артухар хъувурда­лай гуьгъуьниз Лаймона офицер яз къуллугъзава. Гьелбетда, офицервилин чинери жавабдарвал артухарзава, истемишунар еке я. И карни ада 2022-йисан февралдиз, башламиш хьайи махсус серенжемда иштирак авурла, кьатIана.

Дяве акьалтIай пис кар я. Гьайиф хьи, Чилел гьамиша са гьи пипIе ятIани дяве физва. Дявейрик цIай кутазвай империалист ампаяр ава.

Дустуни вичин буржи викIегьдиз кьи­­­лиз акъудзавайди заз чизвай. Кас­пийскдин флотилиядин 117-кьилдин пол­­кунин артиллериядин дивизиондин­ разведкадин начальник, старший лейтенант Нуриев Лаймоназ Россиядин Президентдин Указдалди къалурай кьегьал­вилерай «Жуьрэтлувиляй» медаль гайила, заз гзаф хвеши хьана. Офицер жергедин аскер патал чешне хьана кIанда. КIеви истемишунардай бу­ба ва рикI кузвай стха хьиз тухвайла, аскерди  буйругъ дуьздаказ кьилиз акъудда, командирдин гафунихъ къимет жеда.

Лаймоназ шабагь гьеле 2022-йисан­ августдиз гана. Степановка азаддай жен­гера душмандин десантдинни­ разведкадин десте дуьздал акъудна. Чи батареяди душмандин пулеметдин­ расчет ва пикап машин, 2 миномет, ВСУ-дин 10-дав агакьна аскерар тергна.

Мукьвара Лаймон хуьруьз диде-бу­ба­дин патав куьруь отпускдиз хтанвай­. Гьелбетда, за адаз гзафбурун ри­кIе авай, къалабулух кутазвай кардикай суал гана: дяведа кичI акатзавани? Душман ятIани, чан алай инсан я, ам терг авун регьят кар яни? Гайи жавабди зун тажубарнач: «Гьелбетда, сифте йикъара кичIевални авай, анжах ахмакьдиз гуьл­ледихъай кичIе туш. Анжах дяведа фад вердиш жезва, кичIе жедай вахт амукьзавач», — лагьана дустуни. Командованиди эцигай месэлаяр, фагьум-фикирна, гьялна кIанзава. Четин шартIара командирди зайифвал къалурна виже къведач», — давамар хъувуна Нуриева.

Заз Лаймон аялзамаз, регъуьвал гвай, дамах квачир гада яз чидай. Гила зи вилик агакьай, бегьем чрай, тежрибалу кас акъвазнавай. За фикирна: «И дяведай са касни, виликан хьиз, дегиш тахьана хкведач».

Дяве… Дидейрин тIалар. Бубайри­ чан-рикI авуникай магьрум хьайи аялар… Махсус серенжем давам жезва­. Гьар юкъуз ислягь агьалиярни аскерар телеф жезва. ЦIийихуьряйни, гьайиф хьи, залан хирерикди жегьил аскерар телеф хьанва. Идалай еке  дерт диде-бубадиз, хизанриз жедани?!

Заз дирибаш Лаймонан диде Сунадиз ва буба Резмидиз ватандиз вафалу хва тербияламишунай чухсагъул лугьуз кIанзава. Ахьтин рухвайрал дамах ийиз жеда.

Гьар  юкъуз дяведин татугайвилер, четинвилер аквазвай аскерар, гьабурукай яз зи дуст Лаймон сагъ-саламатдиз чпин хизанрин патав гъалибвал гваз хтун мурад  яз тIалабда чна Худадивай.

Далу пад галачиз гъалибвал къачун армиядиз четин я. Гьар са касдин  буржи я краралди аскерриз куьмек гун, абурук руьгь кутун. Дустуниз, аскервиле авай ви­ри жегьилриз рикIиз чими, шад жедай гафар лугьуз кIанзава заз. Лаймон Ну­риев хьтин инсанар та­хьайтIа, дуьнья кесиб, дар жеда. Ватан­, гьахъвал патал женг чIугвазвай вири кьегьалриз бар­калла!

Максим  Набиев,

Мегьарамдхуьруьн райондин

ЦIийихуьруьн мектебдин директор