Ватанпересвал

«Ава гьахьтин пеше – Ватан хуьн», — лугьузва, тамам тушир мобилизациядик акатна фена, Украинада Россиядин Яракьлу­ Къуватри кьиле тухузвай военный махсус серенжемда иштиракзавай испикви МутIалиб Юсуфова. «Ватан» гафуна неинки жув хайи, яшамиш жезвай район, хуьр, гьакIни гьар са касдин диде-буба, вах-стха, веледарни багърияр, гьар са кас вич ава. КIеве гьатай четин береда абур хуьн гьар са касдин, иллаки итимдин эвелимжи буржи я.

МутIалиб Юсуфов халис ватанперес, дагъви я. И кьегьал хцихъ галаз Испикрин хуьруьн кьил Рагиф Агьмедова мукьвара гуьруьш тешкилна. Гуьруьшда АСП-дин, культурадин идарайрин работникри, райондин ветеранрин советдин председа­тель Ислеман Ризаева, Испикрин юкьван школадин директор Сиражудин Шихбабаева иш­тиракна.

Малум хьайивал, СВО-дин зо­нада М.Юсуфов тупунин лишанчи я. Къуллугъдинни женги­нин везифаяр намуслудаказ­ кьи­­лиз акъу­дунай, дирибаш­вал­, жуьрэтлувал къалурунай  М.Юсу­­­фоваз РФ-дин оборона­дин­­ министр Сергей Шойгудин­ приказдалди «За боевое отли­чие» медаль гана, частунин ко­мандирди чухсагъул малумар­на­­.­ Идакай, гьакIни СВО-да чи офицерринни аскеррин жуь­рэт­­­лувилерикай, дуствилин­ ала­къай­рикай М.Юсуфова гуьруьшдал ихтилатна, СВО-дин­ ишти­ракчийриз ва абурун­ хи­занриз­ куьмек ва фикир гунай район­дин­ кьил Саид Те­мир­ха­новаз­, хуьруьнвийриз сагъ­рай лагьана­.

— Отпуск куьтягь хьайила, зун жува къуллугъзавай частуниз хъфида, женгинин юлдашрихъ галаз санал военный махсус серенжемда иштиракун давамарда, — лагьана гуьруьшдин эхирдай МутIалиб Юсуфова. – Чи кар гьахълуди я, гьавиляй чун гъалибни жеда.

— Гъалибвал къачуна, махсус­ серенжемдин вири иштиракчияр сагъ-саламатдиз чпин хизанрин патав хтун чи мурадни я, — алава хъувуна Испикрин АСП-дин кьил Рагиф Агьмедова.

Хазран Кьасумов