Чи ватандаш рухвайри республикадилай къецени чеб къайда-низам аваз тухун, агалкьунар къазанмишун шад жедай ва чи руьгь хкажзавай кар я. Квез и шикилдай аквазвай Зиядов Эмирагъа Абузеровични гьахьтинбурун жергедик ква. Ам Мегьарамдхуьруьн райондин Къуйсунрин хуьре дидедиз хьана. Армиядин жергейра къуллугъиз фидалдини ада спортда вичихъ устадвал авайди къалурнай. ИкI, ам дзюдодайни самбодай Дагъустандин чемпионвилин тIварариз лайихлу хьана, ада спортдин винидихъ къалурнавай жуьрейрай республикадин хейлин турнирра кIвенкIвечи чкаяр кьуна, адакай дзюдодай Вирироссиядин кесерлу акъажунрин призёр хьана. Эмирагъа Зиядов дзюдодай ва самбодай спортдин мастервиле кандидат я.

Ватандин вилик буржи кьилиз акъудун патал Э.Зиядов Новосибирскдиз акъатна. Ина ам къаравулвалдай ва разведкадин кьилдин батальонда къуллугъдив эгечIна, амма спортдивай къерех хьанач, вичин устадвал ва алакьунар мадни хкажиз алахъна. Спортда къалурай агалкьунрай ам “Воин спортсмен”, “Гвардия” знакриз, Новосибирскдин 54097-нумрадин военный частуна женгинин ва физический рекьяй гьазурлухвилин Отличник тIварцIиз лайихлу хьана.

И йикъара чи кьегьал хва, Ватандин вилик вичин аскервилин пак буржи тамамарна, хайи хуьруьз хтанва. Багърийри ам шаддиз къаршиламишна.

Чаз чи ватандашдихъ уьмуьрда мадни еке агалкьунар хьана кIанзава.

Рагнеда  Рамалданова