Мегьарамдхуьруьн райондин Тагьирхуьруьн-Къазмайрин юкьван школада и йикъара террористрихъ галаз женгина игитвилелди телеф хьайи полициядин капитан Муса Мусаев рикIел хуьнин лишан яз, ада кIелай школадин цлал алкIурнавай кьул ачухуниз талукьарнавай мярекат кьиле фена.
Ана Дагъустан Республикадин Гьукуматдин Председателдин заместитель Рамазан Жафарова, РД-дин къенепатан крарин министрдин везифаяр вахтуналди тамамарзавай полициядин генерал-майор Дмитрий Гутыряди, райондин кьил Фарид Агьмедова, адан заместитель Гьабибуллагь Мурадалиева, образованидин управленидин регьбер Улубег Абейдуллаева, МВД-дин Мегьарамдхуьруьн районда авай отделдин къуллугъчийри, райондин общественностдин векилри, чкадин муниципалитетдин кьил Селимхан Алиханова, школадин директор Гьуьсен Ибилкьасумова, муаллимри, хуьруьнвийри, Дербентдай ва къунши хуьрерай атанвай мугьманри иштиракна.
Мярекат ачухай Фарид Агьмедова къейдна хьи, къуллугъдин рекьяй везифаяр тамамардайла, игитвал къалурай Муса Мавлуьдинович Мусаев вичин уьмуьрда намус-гъейрат, жуьрэтлувал, инсанвилин, ватандашвилин буржи эвелимжи чкадал эцигна, яшамиш хьана. Ихьтин хва тербияламишунай Ф.Агьмедова Муса Мусаеван диде-бубадиз, адаз чирвилер, тербия гайи муаллимриз чухсагъул лагьана.
— Къе чна женгчи юлдаш, чи дуст, жуьрэтлу дагъустанви Муса Мавлуьдинович рикIел хкизва, къейдна Рамазан Жафарова. — Къайда-къанун, инсанрин хатасузвал таъминарун патал вичин чанни гьайиф татай ам, жуьрэтлу кас тир. Террорист кьадайла, тахсиркарар чуьнуьх хьанвай чкадиз кIвенкIве аваз ам вич фена. Муса Мавлуьдиновичаз женгчи юлдашар, вичиз табий къуллугъчияр кьиникьин хаталувилик кутаз кIан хьанач. Алатай четин девирда инсанрин хатасузвал таъминарунин женгера агъзурдалай гзаф игит рухваяр телеф хьана. Абурун тIварар гьуьрметдивди рикIера хуьн чи пак буржи я. Дагъустандин лап хъсан рухвайрикай сад тербияламишунай за адан буба Мавлуьдин Мусаевичаз ва диде Зуьгьре Алиевнадиз сагърай лугьузва. Мусадиз чирвилер ва тербия гайи муаллимриз, мектебдин педагогвилин вири коллективдиз чухсагъул. Муса Мусаеван тIварунихъ галай и школада гьар йисуз 1-сентябрдиз адан игитвилиз талукьарнавай жуьрэтлувилин тарс тухун адет хьанайтIа кIанзавай.
— Муса Мавлуьдиновича жуьрэтлувилин, буржи кьилиз акъудунин чешне къалурна. Полициядин дестедин кьиле аваз яракьлу террористар кьаз фейила, ада женгчи юлдашар хаталувилик кутунач, тахсиркаррин гуьллейрин хура вич акъвазна, кьуд кас кьиникьикай къутармишна, — лагьана Д.Гутыряди.
Мярекатда иштиракзавай школьникрихъ элкъвена, ада алава хъувуна: “Куьне, аялар, гьихьтин пеше хкягъайтIани, виридалайни важиблуди кьегьал хва, Дагъустандин, Россиядин халис ватандаш хьун я. Зун инанмиш я, квекай гьахьтин ватандашар жеда”.
Вилерилай накъвар авахьиз, Муса Мусаеван сад лагьай муаллим Анна Алексеевнади ам гьихьтин низамлу, дуьз тербия авай, чирвилерихъ къаних аял тиртIа, рикIел хкана.
Мярекатдин эхирдай генерал Д. Гутыряди аялриз МВД-дин патай савкьатар пайна.
Муса Мусаева баркалла алаз тухвай уьмуьр, гьайиф хьи, куьруьди хьана — 39 йис. Ам 1976-йисан 1-ноябрдиз Тагьирхуьруьн- Къазмайрал дидедиз хьана. Юкьван школа, финансрин колледж хъсан къиметралди акьалтIарна. Армияда къуллугъна. 1999-йисуз МВД-да къуллугъ авунив эгечIна. Ростовда авай МВД-дин юридический институт агалкьунралди куьтягьна. 2012-йисуз полициядин капитан М. Мусаев МВД-дин Дербент шегьердин отделдин уголовный розыскдин отделенидин начальниквиле тайинарна. Общественный хатасузвал хуьнин карда адахъ лайихлувилер гзаф ава. 2016-йисан майдин вацра Дербентда гзаф хаталу тахсиркарар кьадай махсус серенжем тухудайла, М.Мусаев игитвилелди телеф хьана. Тахсиркарвилерихъ галаз женгина лайихлувилерай, жуьрэтлувал ва игитвал къалурунай РФ-дин Президентдин Указдалди (13.09.2017-йис) Муса Мусаеваз кьейидалай кьулухъ “ВикIегьвилин” орден гана.
Абдулафис Исмаилов
