Дагъустан Республикадин Кьилин везифаяр вахтуналди тамамарзавай Владимир Васильеван тапшуругъдалди республикада “100 мектеб” тIвар алай проект уьмуьрдиз куьчуьрмишзава. И проектдин сергьятра аваз, ремонт авун истемишзавай са шумуд мектеб хкяда ва абурукай гьар садаз республикадин бюджетдай 2 миллион манатдин кьадарда аваз субсидияр чара ийида. Идалай гъейри, республикадин сергьятра авай мектебар ремонт авун патал пулдин такьатар муниципальный тешкилатрин бюджетрайни ахъайдайвал я. И кардал карчиярни желб авун фикирдиз къачунва.
Сулейман-Стальский райондин пресс-къуллугъди “Лезги газетдиз” хабар гайивал, районда образованидин 27 идара аварийный гьалда ава. Шад жедай кар ам я хьи, абур ремонт авунин карда чпихъ мумкинвилер авай мергьяматлу рухвайри иштиракзава. Мисал яз, ДаркIуш-Къазмайрин юкьван мектеб ремонт авуниз “Рычал-су” ОАО-дин руководстводи 1 миллион манатдилай артух пулдин такьатар ахъайда.
Сулейман-Стальский райондин Агъа СтIалрин-Къазмайрал мукьвара машгьур общественный деятель, генерал, и хуьруьн мектеб акьалтIарай Салман Бабаева 400 ученикдиз чкаяр авай цIийи мектеб эцигиз гатIунда. Адан проектринни сметадин документациядин сифтегьан къиметди 7 миллион манат тешкилзава. Мектеб эцигунин карда спонсордиз Сулейман-Стальский райондай маса карчийрини куьмек гун хиве кьунва.
Вичин ери-бине Курхуьрелай тир машгьур карчи, “Коломяги-Ретро” ЗАО-дин генеральный директор Зураб Шайдаева Курхуьруьн М.Рагьимован тIварунихъ галай 1-нумрадин юкьван мектеб ремонт ийиз куьмек гудайвал я.
Агъа СтIалрин мектебдани ремонтдин кIвалахар кьиле тухуда. И макьсаддиз пулдин такьатар Госдумадин VI созывдин депутат хьайи машгьур меценат Мамед Абасова чара ийида.
РикIел хкин, 2017-йисуз М.Абасован стха — “Монолитхолдинг” ООО-дин правленидин регьбер Разим Абасова Дагъустандин халкьдин шаир С.Сулейманан КIвал-музейдиз куьмек яз 1 миллион манат пул ганай.
Сулейман-Стальский райондин кьил Нариман Абдулмуталибова мектебар ремонт авунин, цIийибур эцигунин карда активнидаказ иштиракзавай кьегьал ватанэгьлийриз сагърай лугьузва.
Чи мухбир
