Къенин зи ихтилат Ахцегь райондин Чеперин хуьряй тир Ватандин ЧIехи дяведин иштиракчи, Баркаллувилин III лагьай дережадин ордендин сагьиб Уружев Дадаш Агъададашевичакай я.
Дадаш Уружев 1920-йисан 15-мартдиз харат устIар Агъададашан хизанда дидедиз хьана. Ахцегьрин къеледа кардик квай школа куьтягьайдалай гуьгъуьниз жаванди Махачкъалада госпединститутда кIелна, муаллимвилин пеше къачуна.
1939-йисуз Д.Уружев гуьгьуьллувилелди Яру Армиядин жергейриз фена. Ам Дальний Востокдиз акъатна. Ина ада гъвечIи командирар гьазурдай курсара кIелна.
Пехъи душманди Советрин Союздал вегьей 1941-йисуз сержант Дадаш Уружева къуллугъзавай часть Смоленск шегьердиз рекье туна. Душмандихъ галаз хьайи хейлин женгера викIегь дагъвиди жуьрэтлувал къалурна. Смоленск шегьер патал кьиле фейи женгина адан кIвачел хер хьана. Куьмек вахтунда агакь тавурвиляй Ижевск шегьердин госпиталдин хирургар аскердин кIвач метIелай агъуз атIу-низ мажбур хьана.
1944-йисан 22-сентябрдиз II лагьай группадин инвалид ватандиз аххъайна. Уружев вичин ислягь кеспидив эгечI хъувуна. Яргъал йисара ада хуьруьн аялриз тарсар ва тербия гана.
Шаир, журналист Чепер Касбубади вичин “Чепер-наме” ктабда аскердикай икI кхьенва: “Уружев Дадаш набут яз хтана ва вичин муаллимвилин кеспидив эхгечIна. Ада школадин тербиядин кIвалахдал звал акьулдна, цIийи кружокар тешкилна. Дадаш муаллим хуьруьн жемятдиз лекцияр кIелиз аквадай. Ам гзаф йисара жегьилриз чирвилер гудай политкружокдин пропагандист хьайиди я. Республикадин ва райондин газетрин мухбир яз, ада жемятдин къайгъуйрикай, чешнелу хуьруьнвийрикай датIана макъалаяр кхьидай. Адан теклифдалди цIудралди жегьилар вузрик экечIна. Абурукай дерин чирвилер авай хъсан пешекарар хьана”.
1973-йисуз Дадаш муаллим вичин хизанни галаз Дербент шегьердиз куьч хьана. Инани ада вичин муаллимвилин пеше давамарна. Гуьгъуьнлай ада Дербентдин 14-нумрадин школада библиотекарвиле кIвалахна.
Уьмуьрдин юлдаш Перизатахъ галаз санал ада 8 аял чIехи авуна, абуруз бахтлу уьмуьр тухудай шартIар яратмишна. Дяведин йисара къалурай кьегьалвилерай Д.Уружеваз Баркалладин III дережадин, Ватандин дяведин ва зегьметда къазанмишай агалкьунрай Знак Почета орденар гана.
Алирза Азизханов
