И йикъара Россиядин ФСИН-дин (Федеральная служба исполнения наказаний) Дагъустан Республикада авай Управленидин начальник, къенепатан къуллугъдин полковник Сергей Ролдугина идарадиз талукь месэлайрин патахъай агьалияр кьабулна.

Республикадин гьукумдин органрин векилриз ихтибар авун мягькемарун, кIва­лахдин михьивал къалурун патал кьиле тухузвай ихьтин серенжемрин сергьятра­ аваз, С. Ролдугина УИС-дин (уголовно-испол­ни­тельный система) идарайра кIвалахдал акъвазуниз, дус­тагъра авайбур патал тешкилнавай шартIариз, гьакI дустагъра авайбурун ва абурун багърийрин ихтиярар хуьниз талукь месэлайрин патахъай агьалийрин арзайрихъ яб акална, абуруз гьар садаз кьилди жаваб гана, са жерге месэлайрай алава ахтармишунар кьиле тухунин ва, гежел тевгьена, гьялунин тапшуругъар гана.

— Дугъриданни, ихьтин гуьруьшрихъ, месэладив «диалогдин тегьерда» эгечIунихъ  еке важиблувал ава. ИкI, чаз агьалияр расалмиш жезвай четин месэлаяр, энгел тавуна­, гьялдай, лазим серенже­мар тадидаказ кьабулдай мумкинвал жезва. Ачухдаказ кIва­ла­хун чи кIвалахда кьилин шар­тIа­рикай сад я, — къейдна ада.

Рагнеда  Рамалданова