Чи ватанэгьлияр — гьар сана
16-декабрдиз, Къазахстан аслу тушир кьилдин уьлкве яз къейд авур 30 йисан юбилейдиз талукь яз, Атырау (виликан Гурьев) шегьердин нафтIадинни энергетикадин «Болашак» карханадин зегьметдин кIвенкIвечийриз Къазахстан Республикадин гьукуматдин шабагьар гана. ЧIехи шабагьдиз лайихлу хьайибурун жергеда чи баркаллу ватанэгьли Мирзоев Магьмуд Амруллаевични ава. Республикадин энергетикадин министерстводин патай Къазахстандин лайихлу энергетиквилин гьуьндуьр тIвар ганвайвилин шагьадатнама ва адахъ галаз гимишдин махсус медаль адав шад гьалара Къазахстандин нафтIадинни сервисдин компанийрин Союздин Председатель Рашид Хасенович Жаксылыкова вахкана (шикилда).
— Гьуьрметлу Магьмуд Амруллаевич, чи тарихда лишанлу и юкъуз вав, 45 йисан уьмуьр Къазахстандин энергетика вилик тухуниз намуслувилелди бахшнавай тежрибалу пешекардив, республикадин чIехи шабагь вахкудай кьисмет хьунал за шадвалзава. Им ви яргъал йисарин гьакъисагъ зегьметдиз ганвай лайихлу къимет я. Вуна кIвалахзавай Атыраудин область ва Тенгиз — им Къазахстандин нафтIадин индустриядин рикI я. Вун хьтин вини дережадин пешекаррин алахъунралди и рикIи къе гужлу энергия аваз, сятди хьиз, кIвалахзава. Къуй ваз чандин сагъвал ва зегьметда мадни еке агалкьунар хьурай! Лайихлу тIвар мубаракрай! — тебрикна Рашид Жаксылыкова.
— Энергетиквилин кIвалах заз квелди хуш я лагьайтIа, жуван зегьметдин нетижа акурла, руьгьдин ва жув жувалай разивилин лезет жезва. Нагагь шегьерда са сятда электричество тахьайтIа, эквни чимивал ва чун вердиш яшайишдин амай вири къулайвилерни квахьна, уьмуьр акъвазайди хьиз жеда. И кардиз рехъ тагуз чун алахъзава… — тебрикзавайбуруз чухсагъул малумаруналди къейдна Магьмуд Мирзоева.
Мирзоев Магьмуд 1953-йисуз Ахцегьа Ватандин ЧIехи дяведин иштиракчи, муаллим Амруллагьан чIехи зегьметкеш хизанда дидедиз хьана. Ахцегьрин 1-нумрадин школа агалкьунралди куьтягьай зигьинлу ва бедендиз мягькем жегьилди 3 йисалай гзаф вахтунда Мурманск шегьерда ВМФ-да, цин кIаникай фидай гимида чешнелудаказ къуллугъна. 1975-йисуз Ташкентдин энергетикадин институт акьлтIарна, гьана энергетикадин хиле сифте мастер, ахпа инженер яз кIвалахна. 1987-1994-йисара Магьмуд Мирзоевал Тенгиз шегьерда “Энергомонтаж” эцигунрин управленидин (СУ) начальниквилин жавабдар везифаяр ихтибарна. Гьа макъамда СССР-дихъ галаз гьа и карханани терг хьуникди 4 йисуз Москвада кIва-лахна. Гуьгъуьнлай ам вичин кьвед лагьай ватан хьанвай Тенгиздиз хъфена,1998-йисалай ТОО “Ариадна” карханада инженервиле къуллугъна. Алай вахтунда М.Мирзоева, NCOC компаниядин “Болашак” карханадин генеральный директордин заместитель яз, Тенгиздин нафтIадин мяденрилай къеце “Ариадна” ТОО-дин проектрин кураторвал ийизва. Зегьметкеш чIехи коллективда, шегьердин руководстводин ва чкадин жемятдин арада кар алакьдай тежрибалу пешекарди намуслу зегьметдалдини къени къилихралди лайихлу гьуьрмет къазанмишнава.
Дагълух хайи ватандивай яргъаз акъатнаватIани, Магьмуд Мирзоева мукьва-кьилийрихъни ярар-дустарихъ галаз сих алакъаяр хуьзва. Гьар йисуз вичин рухсат Дагъустанда, хайи хуьре акъудун, багърийрин хийир-шийирдикай хкечI тавун адаз адет хьанвай кар я.
“Авайвал лугьун, гьар сеферда хайи ватандиз хтайла, чи машгьур гьамамрин дармандин ятари, дагъдин тIебиатди, мукьва-кьилийрихъни ярар-дустарихъ галаз хуш рафтарвилери, са гафуналди, Ахцегьрин кьетIен энергетикади зун руьгьламиш, сагълам, гужлу хъувуна рекье хутазва”, — лугьузва ада.
Магьмуд Мирзоеваз чна лайихлу шабагь рикIин сидкьидай мубаракзава. Къуй чи ватанэгьлийри чеб авай чкайра, гьа икI лайихлудаказ тухуз, яшамиш жез, чи гуьгьуьлар шадаррай!
Дашдемир Шерифалиев
