Сулейман-Стальский райондин пуд хуьре меценатрин – къаюмрин куьмекдалди Ватандин ЧIехи дяведа чанар гайи аскерар эбеди рикIера хуьниз талукь тимталар эцигда. Идакай «Лезги газетдиз» райадминистрациядин пресс-къуллугъди хабар гузва.   

Алай вахтунда Саидхуьре ихьтин тимтал эцигунин кIвалахар саки акьалтIарнава, идалайни гъейри, къаюмди хуьре ял ядай багъни туькIуьрзава, къваларив гвай сергьятарни кIевирзава. И кардиз 1 миллион манат серфдайвал я. Вини СтIалрин хуьре лагьайтIа, Гъалибвилин сувар къведалди, ял ядай багъ абадунин ва аскерриз талукь стела туькIуьрунин кIвалахар куьтягьда. И кIвалахар патал къаюмди 6 миллион чара авунва.

Гъалибвилин юкъуз КIахцугърин хуьре дяведин иштиракчийриз талукь тимтал ачухдайвал я. И кардик хуьруьнвийри хушуналди чпин кутазва.

Ихьтин баркаллу кIвалахрик чпин пай кутазвай ватанэгьлийриз райондин кьил Н.Абдулмуталибова чухсагъул лугьузва.

«Лезги газет»