Сулейман-Стальский райондин администрациядин сайтди хабар гузвайвал, 26-майдиз Кьасумхуьрел РФ-дин журналистрин Союздин член, РД-дин культурадин лайихлу работник, шаир Абидин Камилован яратмишунриз талукьарнавай мярека кьиле фена. Ана райондин кьил Нариман Абдулмуталибова, райондин депутатрин Собранидин председатель Штибег Мегьамедханова, райондин администрациядин жавабдар къуллугъчийри, шаирри, гьикаятчийри, Культурадин кIвалин гьевескарри, Герейханован хуьруьн Р.Османован тIварунихъ галай мектебда кIелзавай аялри ва масабуру иштиракна.
Нариман Абдулмуталибова шаирди яратмишунрин рекье къазанмишзавай агалкьунриз виниз тир къимет гана ва СтIал Сулейманан 148 йис тамам хьунихъ галаз алакъалу яз кьиле тухвай мярекатар тешкилуник лайихлу пай кутунай А.Камиловав Сулейман-Стальский райондин Гьуьрметдин грамота вахкана.
Абидин Камилован яратмишунрикай чпин фикирар мад Рамазан Абдулазизова, Абдулаким Гьажимурадова, Жабраил Асланова, Халилбег Халилбегова, Агьмедпаша Агьмедпашаева, Гьуьсейн Гьуьсейнова, Ярагьмед Ярагьмедова, Райсудин Набиева, Демирбег Эмирбегова, Нажмудин Шихнабиева ва масабуру лагьана.
Къейд ийин хьи, мярекат райондин библиотекайрин къурулушрин къуллугъчийри тешкилнавай.
«Лезги газет»
