Зун шегьеррин арада къекъвезвай “Дербент- сергьят” электричкадин пассажиррикай сад я. Заз эхиримжи са йисан вахтунда Дербентдин вокзалдик хьанвай еке дегишвилер къейд ийиз кIанзава. Платформайрал къулайвилер арадал гъанва, вокзалдин патав гвай чкаяр михьи я ва рикI шадардай жуьреда туькIуьрнава.
Вокзалар шегьердинни, ракьун рекьинни чин я лагьайтIа, зун ягъалмиш жедач. Агьалийри ракьун рехъ гьихьтинди ятIа, гьадакай фикир вокзалдиз килигна хкудзава. Белки, гьаниз килигна ятIа, Дербентдин ракьун рекьин вокзалдин къуллугъчийри чпин кIвалах жезмай кьван намуслудаказ, жавабдардаказ тамамарзавайди, пассажирар гьамиша рази яз амукьдайвал.
Кьиблепатан Дагъустандин агьалияр патал Дербент виридалайни мукьув гвай шегьер я. Адаз гьакIни хуьруьн майишатдин суьрсет маса гудай центрани лугьуз жеда. И жигьетдай агьалияр патал электричкадилай гзаф къулай маса транспортдин такьат авач.
Гьерекатзавай инсанрин кьадар пара ятIани, Дербентдин вокзалдилай, кIвалах дурумлудаказ, инанмишвилелди кьиле тухуз алакьзава. И карда, гьелбетда, еке роль вокзалдин руководстводи къугъвазва.
Къе заз квез ракьун рекьин “генерал” ва лап хъсан инсан Рагьимханов Аслан Мовлановичакай суьгьбетиз кIанзава. 1994-йисалай инихъ адан кьисмет ракьун рекьихъ галаз сихдаказ алакъалу хьана. Алай вахтунда ада Дербентдин ракьун рекьин вокзалдин начальник яз зегьмет чIугвазва. И къуллугъдал ам хьана гзаф вахт туш, ятIани, Аслан Мовлановичан регьбервилик кваз вокзалдин къуллугъчийрин вири коллективдин кIвалах виле акьадайвал дегиш хьанва.
И мукьвара заз вокзалдик куьгьне паровоз акуна. Малум хьайивал, ина Дербентдин ракьун рекьин тарихдин музей ачухнава. Ам арадал гъунин карда Аслан Мовлановичан чалишмишвилер екебур я лагьайтIа жеда.
Ам гъвечIи чIавалай къастунал кIеви кас тир. Лагьай гафни гьамиша кьилиз акъуддай. Вичин къилихдин гьа и терефди адаз, Мегьарамдхуьруьн райондин Филерин хуьре яшамиш жезвай чIехи хизандай тир жегьилдиз, Ростовдин ракьун рекьерин государстводин университетда кIелиз ва гуьгъуьнлай “Дербент — сергьят”, “Дербент-Махачкъала” поездрин кассирдин къуллугъдилай Дербент шегьердин вокзалдин начальникдин къуллугъдал агакьдалди рехъ атIуз куьмек гана.
За жуван ва вири пассажиррин патай Аслан Мовлановичаз алукьзавай хайи югъ мубаракзава, адахъ сагъвал ва бахтар хьана кIанзавайвилин келимаяр лугьузва. Къуй вич гьамиша уьмуьрдал кьару кас яз амукьрай.
М.Ашурбегова
