Бязи инсанар жеда, чеб чи арада амачирлани, абуру авур крар, къени кIвалахар, гьатта фикирарни мукьвал-мукьвал рикIел хкведа, къамат зигьиндай акъатдач. Ихьтинбурукай сад зи дуст ва амадаг Эмирханов Аскер Эмирханович тир. Къе, радиодин ва алакъадин вири хилерин работникрин Йикъан вилик, заз вичин зегьметдин вири уьмуьр и рекьиз бахш авур адакай суьгьбет ийиз кIанзава.
Эмирханов Аскер 1954-йисан 11-январдиз Мегьарамдхуьруьн райондин Азадогъли хуьре дидедиз хьана. 1961-йисуз ам муьжуьд йисан мектебдиз фена. 9-10-классра кIелун ада Оружбадин юкьван мектебда давамарна. Тарсар лап хъсандиз чирунал рикI алай, кьатIунар авай гадади школадин общественный кIвалахрани активнидаказ иштиракзавай. 1968-йисалай ам ВЛКСМ-дин жергейрани хьана. Гуьгъуьнлай Ватандин вилик буржи тамамариз фейилани, Аскера вич хъсан патахъай къалурна — “Советрин Армиядин отличник” лагьай тIвар къачуна.
1975-йисуз Аскер Эмирханов Дагъустандин политехнический институтдик экечIна, вад йисалай “Автоматика ва телемеханика” пешедай тамам курс акьалтIарна. 1980-йисан 28-июндиз адаз инженер-электрикдин пешекарвал гана. Аскер Эмирхановичакай алакъадин такьатрин промышленностдин хиле пешекар хьана.
ИкI, 1981-йисалай ада Дербентдин илимдинни ахтармишунрин “Волна” институтда вичин зегьметдин рехъ башламишна. Сифтедай — инженер, ахпа — старший инженер, кар алай инженер, тематический сектордин начальник. Аскер Эмирханова АВCK (алакъадин махсус такьатар) алай аямдин истемишунрив кьадайвал туькIуьрунин кIвалахар идара ийизвай. ГьакIни ам къенепатан алакъадин гележег авай такьатар гьазурунин рекье са жерге НИОКР-рин (илимдинни ахтармишунин ва тежрибадинни конструкторвилин кIвалахар) кьилин инженер тир. Яни ам проектрин сергьятра аваз интеллектуальный ва я материальный цIийи продуктар гьазурунал, цIийи технологияр туькIуьрунал ва я авайбур мадни хъсанарунал машгъул жезвай.
ГьакIни ам ВОЛС (волоконно-оптический алакъадин линияр) ишлемишуналди АВСК туькIуьрунин кIвалахдин кьиле авай.
А чIавуз абуру теклифай инженервилин къарарар къени кар алайбур, чпихъ игьтияж авайбур яз ама.
Аскер Эмирхановича къенепатан алакъадин системаяр вилик тухудай гележег авай рекьер хкягъунин, институтдин илимдинни инженервилин къуватар, мумкинвилер хуьнин, тамамарзавай НИОКР-рин кьадар ва жуьреяр артухарунин месэлайриз еке фикир гузвай.
Ам къенепатан алакъадин аппаратурадин ва чилел алай юзуриз жедай объектрин (“Ориентирование”, Команда М-Д”) коммутациядин гележегдин еримлувал тайинаруниз талукь илимдинни ахтармишунрин кIвалахдин кьилин конструктор тир. И кIвалахдин нетижада къенепатан алакъадин цIийи системаяр производствода ишлемишиз башламишна.
Къейд ийиз кIванзава хьи, адан регьбервилик кваз АВСА-дин рекъемрин системаяр арадал гъунин кIвалах тухванва ва авиациядин къенепатан алакъадин (пассажиррив хабарар агакьардай ва абур машгъулардай) аппаратурадин алай аямдин ва базарда гьуьжетиз жедай чешмеяр гьазурнава.
Илимдин рекьяй чIехи кIвалах кьиле тухузвайтIани, Аскер Эмирханов институтдин профсоюздин регьберни тир. Ада общественный уьмуьрдиз талукь гзаф крар тамамарзавай, коллективдихъ галаз саналди тир мярекатар тешкилзавай. Аскер Эмирхановичан хизанда пуд хва чIехи хьанва. Бубадин тербия ва рикIин экв абуру ва ругуд хтулди къени краралди, юлдашрин, жемятдин арада гьуьрмет къазанмишуналди давамарзава.
В.Гьажиагъаев
