Саласадиз Дагъустандин Кьил Сергей Меликова кьиле тухвай нубатдин совещанидал кар алай са шумуд месэла веревирдна: гьукумдин органри ватандашрин арзайриз фикир гузвай гьал; Кавказдин инвестицийрин форумда Дагъустанди иштиракунин нетижаяр; информация раижунин жигьетдай РД-дин Халкьдин Собранидин депутатрин, гьукумдин органрин регьберрин, районринни шегьеррин кьилерин ачухвал; Дагъустанда «Мензилрин делилрин милли къурулуш» госпрограмма кьилиз акъудзавай гьал; республикадин муниципалитетар кIеви амукьаяр гадардай ракьун чанахъралди ва абур эцигдай майданралди таъминвал.
Республикадин регьберди совещанидив Къайтагъ райондин кьил къуллугъдилай алудуникай ихтилатуналди гатIунна. «Республикадин Кьили тапшурмишай крар кьилиз акъуд тавуни кадрийрин ва административный къарарар кьабулунал гъида. За вирибур тагькимарнай: ша республика еримлу авунин тапшуругъар тамамарин», — лагьана С. Меликова.
Гьукумдин органри агьалийрин арзайриз фикир гузвай гьалдикай рахадайла, РД-дин Кьилин ва Гьукуматдин Администрациядин регьбер Махач Омарова къейд авурвал, майдин вацра, алатай и муддатдив гекъигайла, соцсетра арзайрин кьадар пуд сеферда тIимил хьана. Агьалийри виридалайни гзаф къарагъарзавай пуд месэладик электроэнергиядихъ, рекьер ремонт авунихъ ва датIана целди таъмин тахьунихъ галаз алакъалубур акатзава.
КИФ-дин (Кавказдин инвестицийрин форум) нетижада Дагъустандихъ хьайи агалкьунрикай РД-дин экономикадин ва мулкар вилик тухунин министр Гьажи Султанова ихтилатна. Дагъустандин делегацияди форумдал туризмдин, хуьруьн майишатдин, санайидин ва логистикадин хилера республикадихъ авай экономикадин мумкинвилериз талукьарнавай выставка ачухна. Гъалибвилин 80 йисаз бахшнавай арт-объектни квай стенд гзаф ксари фикир желбайдаз элкъвена.
Кар алай проектрикай сад Дагъустандин регьберди раижай Каспийдин къерехдин кластер тир — Каспий гьуьлуьн къерехда йисан кьиляй-кьилиз кардик жедай курорт. КИФ-дин сергьятра аваз, Дагъустанди са жерге икьрарар кутIунна, гьа жергедай яз Ингушетиядихъ, Кеферпатан Осетия-Аланиядихъ ва Кабардино-Балкариядихъ галазни.
Депутатрикай, министррикай ва муниципалитетрин кьилерикай агьалийрихъ галаз СМИ-ра ва соцсетра активвилелди алакъадал алайбур вужар я? И жигьетдай авай гьалариз Дагъустандин АГиП-дин регьбердин заместитель — информациядин сиясатдин управленидин ва РД-дин Кьилин пресс-къуллугъдин начальник Рашид Акавова ихтилатна.
Адан гафаралди, депутатрин арада сад лагьай чкадал Елена Павлюченко ала, кьвед лагьай чкадал — Осман Булатов. И жигьетдай депутатар тир Марат Алиярован ва Асият Алиевадин дережаярни кьакьан я. Майдин вацра виридалайни гзаф Гьажимурад Малаев тафаватлу хьана. Март-апрель варцара муниципалитетрин кьилерин арада Махачкъаладин мэр Юсуп Умавов сад лагьай чкадал хьана. Информациядин майданра чпин нетижалу кIвалахар къалурайбурун жергеда Табасаран райондин кьил Мегьамед Къурбанов, Хасавюртдин кьил Коргъоли Коргъолиев ава.
СМИ-ра чпин кIвалахар раижунин жигьетдай гьукумдин органрин арада кIвенкIвечивал и сефердани республикадин здравоохраненидин министерстводив гумукьна. Адан гуьгъуьнал хуьруьн майишатдинни недай суьрсетдин ва транспортдин министерствояр ала.
«Мензилрин делилрин милли къурулуш» госпрограмма Дагъустанда кьилиз акъудзавай гьалдикай вице-премьер — чилин ва эменнидин алакъайрин рекьяй министр Заур Эминова малумат гана. Кьилди къачуртIа, ам муниципалитетри ЕГРН-диз малуматар акъудунин серенжемдал акъвазна. «2016-йисалай 2022-йисалди инсанар яшамиш жезвай 168 чкадин (хуьрерин, шегьеррин) часпарар ЕГРН-дик кутунвай, эхиримжи кьве йисуз чалай и рекъем 1018-дал кьван артухариз алакьна. Вири санлай 1577 часпар къалурна кIанзава», — лагьана Заур Эминова.
Зирзибилар гадардай къапариз ва абур эцигдай майданриз талукь темадай республикадин тIебиатдин ресурсрин ва экологиядин министр Ратмир Расулова ихтилатна. Региондин эцигунрин, архитектурадин ва ЖКХ-дин министерстводин кьил Бахтияр Уллаева инвалидвал авай СВО-дин иштиракчияр кIвалахдалди таъминаруникай лагьана.
Совещанидал ракьун рекьерилай элячIдай чкайрал хатасузвал таъминаруниз, образованидин месэлайриз талукь веревирдерни авуна.
«Лезги газет»
