И йикъара Мегьарамдхуьруьн райондин кьил Фарид Агьмедова дзюдодай СССР-дин спортдин устад Геннадий Недвигин рикIел хкуниз  талукьарнавай Вирироссиядин ХХ лагьай акъажунра гъалибвал къачур ва гадайринни рушарин арада дзюдодай кьиле фейи СКФО-дин чемпионатда хъсан чка кьур жегьил спортсменка – Мильвара Мирземетова тебрикна. И гьакъиндай «Лезги газетдиз» райадминистрациядин пресс-къуллугъди хабар гана.

Райондин кьилин тебрикда къейднавайвал, Мильвара Мирземетова еке алакьунар авай, хъсан нетижаяр къалурзавай спортсменка я. Дзюдодай кьиле фейи Вирироссиядин акъажунра ада вичин заланвилин дережадай инанмишвилелди гъалибвал къазанмишна.

«За адаз гележегдани агалкьунар, лайихлу гъалибвилер хьун алхишзава. Акьалтзавай жегьил несил патал ам хъсан чешне я», — кхьенва Ф.Агьмедован тебрикда.

Чи мухбир