Суддин къарардалди
“Лезги газетдиз” республикадин УФССП-дин пресс-къуллугъди хабар гайивал, и йикъара Махачкъалада къанунсуздаказ эцигнавай гараждин ва туьквендин дараматар чукIурна.
Абурун гьакъиндай талукь къарарар Дагъустандин меркездин Кировский ва Советский районрин судри акъудна. Дараматар къанун-къайдадал амал тавуна эцигнавайдакай ва абур чукIурна кIанзавайдакай гараждинни туьквендин иесийриз лагьанвай. Амма абур суддин къараррив жавабдарвилелди эгечIнач. Нетижада суддин приставрин иштираквал аваз кьве дараматни махсус техникадин куьмекдалди чукIурна.
Къейд ийин хьи, Махачкъалада къанун-къайдадал амал тавуна ийизвай эцигунрин кIвалахрин вилик пад кьунин жигьетдай кьиле тухузвай кIвалах давам жезва.
Чандиз къаст авуна
РД-дин МВД-дин пресс-къуллугъди хабар гузвайвал, къанун-къайда хуьдай органрин векилри Хасавюрт шегьерда вичин дидедин чандиз къаст авунай шак физвай 24 йис хьанвай гада кьуна.
Мусибатдин дуьшуьш алатай гьафтеда арадал атана. Дидени хва сад-садахъ галаз еке къалриз акъатна. Нетижада хци вичин дидедал чукIулдин са шумуд хер авуна. 49 йис хьанвай дишегьлидиз духтурривай куьмек гуз хьанач, ада шегьердин кьилин духтурханада чан гана.
Тахсиркар полициядикай чуьнуьх хьанвай. Уголовный розыскдин къуллугъчийри ам авай чка тайинарна ва кьуна.
Ада вичин тахсиркарвал инкарнач. Уголовный дело къарагъарнава. Силисдин управленидин къуллугъчийри мукьвара дело суддиз рекье твадайвал я.
Балугъар кьунай
Къизляр райондин судди къанунсуздаказ балугъар кьунай республикадин 6 агьали уголовный жавабдарвилиз чIугуна. РФ-дин ФСБ-дин РД-да авай Сергьятдин Управленидин пресс-къуллугъди хабар гузвайвал, И.Мегьамедова осетрдин жинсинин балугъар кьун патал 6 касдикай ибарат десте арадал гъана. Каспий гьуьляй абуру къанунсуздаказ балугъар кьунин нетижада 6 миллион манатдилай виниз зарар гана.
Суддин къарардалди 6 касни дус-тагънава. Идалайни гъейри, абуру санал государстводин хийирдиз 6 555729 манат пул вахкана кIанзава.
Лутувал авунай
РД-дин Силисдин комитетдин пресс-къуллугъди хабар гайивал, Леваша райондин 62 йисан яшда авай агьалидилай уголовный дело къарагъарнава. Адак пенсиядихъ галаз алакъалу месэлайра лутувал авунай тахсир кутазва.
Силисди гьисабзавайвал, 2010-йисуз къанунсуз гьерекатар авунай шак физвайда пенсиядиз экъечIун патал вичин яшар 9 йисан артухарна, къалп делилар авай паспорт къачуна. Идалайни гъейри, ада гьакъикъатдихъ галаз кьан тийизвай делилар гьатнавай зегьметдин цIийи книжкани къачуна.
Гьа икI, къалп документрин бинедаллаз ада 2010-2019-йисара 1,3 миллион манатдив агакьна къанунсуздаказ пенсия къачуна.
Силисдин комитетдин пресс-къуллугъдин векилди алава хъувурвал, тахсиркарди РФ-дин Пенсийрин фондуниз ганвай зарар арадал хкун патал лазим тир серенжемар кьабулда. Идалайни гъейри, уголовный делодин сергьятра аваз, Федеральный миграциядин къуллугъдин ва Пенсийрин фондунин отделенидин жавабдар къуллугъчийрин гьерекатризни органри къимет гудайвал я.
Тиряк жагъана
Полициядин къуллугъчийриз Къизлярда авай заводдин ишлемиш тийизвай дараматдай тиряк (марихуана) чуьнуьхнавай чка жагъана. Идакай РД-дин МВД-дин пресс-къуллугъди хабар гузва.
Тиряк чуьнуьхнавай чка къанун-къайда хуьдай органрин векилри розыскдин мярекатар кьиле тухузвай чIавуз жагъана. И кардай шак физвай кас кьунва. Ада вичин тахсиркарвал хиве кьуна ва тиряк анжах вичи ишлемишун патал хуьзвайди тир лагьана.
Къейдзавайвал, адан гьакъиндай РФ-дин Уголовный кодексдин 228-статьядин бинедаллаз уголовный дело къарагъарнава.
Гьазурайди — Агьмед Магьмудов
