Алатай вацран эхирра Коломна шегьерда конькийраллаз чукурунин спортдин жуьредай Вирироссиядин “Къизилдин конькияр” акъажунар акьалтIна. “Коломна” тIвар алай муркIадин майдандал кьиле фейи акъажунра уьлкведин 32 региондай 13-15 йисан яшара авай 180-далай гзаф жаванри иштиракна. Адет тирвал, гъалиб хьайибурни хъсан чкаяр кьурбур РФ-дин спортдин министерстводин патай медалралди, дипломралди къейдна.
Чаз малум хьайивал, конькийраллаз чукурунин “многоборье” жуьредин акъажунра Москвада яшамиш жезвай лезги руш Камила Ханбалаева гъалиб хьана.
К.Ханбалаева 2006-йисан 1-майдиз Махачкъалада бутхуьруьнви Расулан хизанда дидедиз хьана. 2008-йисалай Москвада яшамиш жезвай руша алай вахтунда 8-классда кIелзава, ам конькийрин спортдални рикIивай машгъул я.
Вичин рикI алай спортда адахъ еке агалкьунар хьун чи мурадни я.
«Лезги газет»
