И йикъара Дагъустандин Кьил Владимир Васильева Оперативный штабдин заседанидин сергьятра аваз гьукумдин органрин векилрихъ галаз республикада коронавирусдин тIугъвалдиз талукь яз арадал атанвай гьалар веревирдна.
В.Васильева хабар гайивал, мукьвара Урусатдин Президент Владимир Путина кар алай са шумуд месэла къейд авуна. Кьилди къачуртIа, ада вири уьлкведа кардик кутунвай карантин 11-майдалди давамар хъувунва. Лагьана кIанда, майдин ял ядай йикъарин арада авай кIвалахзавай пуд югъни (6,7,8-май) ял ядайбур яз малумарнава.
Уьлкведин регьберди ихьтин къарар акъуднаватIани, Владимир Васильева Дагъустандин шегьеррин, районрин администрацийрин кьиле авайбур чкадал хьун герек тирди къейдна. Республикадин Кьили алава хъувурвал, регионда тIугъвалдиз акси серенжемар кьабулун давам жезва. Адан гафаралди, къенин юкъуз чкадин азарханайра бес кьадар койкаяр, ИВЛ-дин (нефес къачуз куьмек гудай) аппаратар ава.
Коронавирусдин вилик пад кьун патал Дагъустанда кьабулзавай серенжемрикай гегьеншдиз РД-дин Роспотребнадзордин Управленидин кьил Николай Павлова суьгьбетна. Ада хабар гайивал, 30-апрелдин делилралди, республикада коронавирус акатнавайбурун кьадар 1389-дав агакьнава. Гьа са вахтунда духтуррилай начагъ хьанвай 112 кас сагъар хъийиз алакьна. Санлай къачурла, 18715 кас ахтармишнава. 2675 кас лагьайтIа, карантинда ава. ТIугъвалдик республикада 12 кас кьенва.
Заседанидин сергьятра аваз начагъбуруз медицинадин рекьяй хъсан еридин куьмек гун патал кьабулзавай серенжемриз, агьалийри республикада кардик кутунвай къайдайрал амал авуниз талукь месэлайризни килигна. Кьилди къачуртIа, РД-дин къенепатан крарин министрдин заместитель — полициядин начальник Дмитрий Гутырядин, республикадин здравоохраненидин министр Жамалудин Гьажиибрагьимован, РД-дин МЧС-дин кьил Нариман Къазимегьамедован докладрихъ яб акална.
Кьиле тухузвай кIвалахдин менфятлувал артухарун патал Владимир Васильева жавабдар ксариз алава тапшуругъар гана.
Къейд ийин хьи, Оперативный штабдин заседанида РД-дин Гьукуматдин Председатель Артем Здунова, РД-дин Кьилин ва Гьукуматдин Администрациядин Руководитель Владимир Иванова, вице-премьерар Владимир Лемешкоди, Рамазан Жафарова, РД-дин образованидин ва илимдин министр Уммупазиль Омаровади, РД-дин зегьметдин ва яшайишдин рекьяй вилик финин министерстводин регьбер Изумруд Муьгьуьдиновади ва масабуру иштиракна.
Чи мухбир
