Алатай вацран эхирра Уфа шегьерда грекринни римлуйрин жуьреда кьуршахар кьунай итимрин арада Вирироссиядин кIвенкIвечивал — Россиядин Кубок патал кьиле фейи акъажунра чи машгьур спортсмен, Москвадин патай экъечIзавай, тренер Алексей Красавинан гъилик вичин устадвал хкажзавай Анвар Аллагьярова 63 кг-дин заланвал авайбурун арада къизилдин медаль къазанмишна.
Алай йисуз им чи ватанэгьлиди къазанмишнавай сад лагьай агалкьун туш. ИкI, февралдиз ам грекринни римлуйрин жуьреда кьуршахар кьунай Бухарестда (Румыния) кьиле фейи Европадин чемпионатда буьруьнждин медалдиз лайихлу хьана.
РикIел хкин: вичин ери-бине Ахцегьай тир А. Аллагьярова спортдин сирер сифтедай Махачкъалада чирна. Гуьгъуьнлай Зеленоградда (алай вахтунда ам и шегьерда яшамиш жезва), Москвада Олимпиададин резервдин махсус училищеда устадвал мадни хкажна. Ам Россиядин, Европадин ва 23 йисал къведалди яшда авайбурун арада дуьньядин чемпион ва хейлин акъажунринни международный турниррин гъалибчи я. Чи ватанэгьли грекринни римлуйрин жуьреда кьуршахар кьунай Россиядин хкянавай командадик ква.
***
И йикъара Каспийскда, Къ. Къурамегьамедован тIварунихъ галай физкультурадинни сагъламвал мягькемардай комплексда, ММА-дай KFL лигадин турнирда — адан макьсад жегьил спортсменар майдандиз акъудун я — чи ватанэгьли, вичин ери-бине Докъузпара райондин Къаракуьредай тир Зиядин Мегьтиева Камил Мегьамедовахъ галаз бягьсина инанмишвилелди гъалибвал къазанмишна. Гзаф къизгъин ва итижлу бягьсина судьяйрин сад тир къарардалди чи ватанэгьли гъалиб хьана.
Къейд авун лазим я хьи, алай вахтунда Дербентда яшамиш жезвай ва спортдин рекьяй вичин устадвал хкажзавай З. Мегьтиева вичикай спортдин майданра икьван гагьдини хабар ганва. Ам яшар 18 йисалай виниз алатнавай жегьилрин арада ММА-дай Дагъустандин кIвенкIвечивал патал акъажунрин, республикадин са шумуд турнирдин гъалибчи я.
***
Са тIимил йикъар идалай вилик Владикавказ шегьерда Вирироссиядин физкультурадинни спортдин «Ислягь Кавказ» фестиваль кьиле фена. Ана чи республикадайни гзаф спортсменри чпин устадвал къалурна. Вичин ери-бине СтIал Сулейманан райондин Вини СтIалдилай тир, алай вахтунда Махачкъалада 48-нумрадин мектебдин 9-классда кIелзавай Гьажибала Баламирзоева 14-15 йисара ва 57 кг-дин заланвал авайбурун арада гъилералди кукIунай 2-чка кьуна.
Им чи ватанэгьлидин сад лагьай агалкьун туш. ИкI, спортдин и жуьредай ада Дагъустандин кIвенкIвечивал патал акъажунра гимишдин медаль къазанмишна. Ам клубрин арада кьиле фейи, шегьердин кIвенкIвечивал патал ачух турниррин гъалибчи я.
Спортдин чIехи кукIушрихъ садлагьана тек-бир ксар агакьун мумкин я. И рекье машгьурвал къазанмишун патал спортдал рикI гваз машгъул хьун, къастунал кIевивал авун ва икI мад ерияр герек тирди аннамишзава Гьажибалади. Гьаниз килигна, ам тренер Артур Абдуллаеван гъилик спортдал рикIивай машгъул жезва, мектебдани ада хъсан къиметар аваз кIелзава. Сир туш, спортдин рекье гъвечIи гъалибвилери руьгь кутурла, мадни чIехи кукIушар муьтIуьгъардай ашкъи ва къуват жеда. Умудзава хьи, гележегда Гьажибалади, гьакI маса чи жегьилрини спортдин кесерлу майданра чпикай хабар гуда.
Рагнеда Рамалданова
