Чи ватанэгьлияр — гьар сана
Мегьарамдхуьруьн райондин Тагьирхуьруьн-Къазмайрилай тир Низами (Шихзада) Мамедов гзафбуруз сейли инсан, кардик кьил кутадай ва агалкьунралди кьилизни акъуддай тешкилатчи хьизни малум я. Са вахтара ада Махачкъалада ДГПИ-да студентриз музыкадин тарсар гана. Гуьгъуьнлай, хайи хуьруьз куьч хъхьайла, муаллимди вичин пешедин рекьяй инани цIийи камар къачуна, цIийи цIирер кутуна. Адан алахъунар себеб яз, Тагьирхуьруьн-Къазмайрал акьалтзавай несилрин гележег патал еке метлеб авай аялрин музыкадин мектеб кардик акатна. Ам музыкадин рекьяй алакьунар авайбуруз гегьенш майданризни кьакьан мертебайриз экъечIунин карда рум гудай макандиз элкъвена… Амма къе зи ихтилат Низами Мамедовакайни ада арадал гъайи мектебдикай ваъ, ихьтин кар бажармишдай бубадин хцикай — духтур-невролог яз Сургутда кIвалахзавай Феликс Мамедовакай я.
Ам 1984-йисан 28-ноябрдиз Махачкъала шегьерда муаллимдин хизанда дидедиз хьана. Тагьирхуьруьн-Къазмайрин мектеб куьтягьайдалай кьулухъ Феликс Каспийскдин медучилищедик экечIна ва 2005-йисуз анаг тафаватлу дипломдалди куьтягьна. Мадни чIехи дережаяр, гзаф чирвилер къачунин мурад аваз, жегьилди гьа училище куьтягьай йисуз, энгелвал тавуна, Астрахандин медицинадин академиядиз документар вугана. Ина лечебный факультет агалкьунралди куьтягьай адаз Астраханда акъвазун ва неврологвилин пешедай кIвалахун теклифна. ИкI, ина ада вичин зегьметдин рехъ башламишна. Са кьадар вахтунда кIвалахайдалай кьулухъ здравоохраненидин департаментдин теклифдалди 2012-йисалай къедалди Феликса Ханты-Мансийский автономный округдин Сургут шегьерда духтур-невролог яз кIвалахзава.
Вилик эцигай макьсадар кьилиз акъудун патал вич тербиялувилелди, чешнелувилелди кьиле тухузвайвиляй ада амадагрин арада гьуьрметни къазанмишна.
Пешедин рекьяй тежриба кIватIунилай гъейри, жегьил пешекар медицинадай илимдин кIвалахдални машгъул я. Адан хизанда кьве гъвечIи руш чIехи жезва.
Къейд ийин, Феликсан чIехи стха Темирагъади алай вахтунда Тагьирхуьруьн-Къазмайрин аялрин искусстводин мектебдин директорвиле кIвалахзава.
Къуй абурухъ гьар са карда агалкьунар, кьакьан дережаяр хьурай!
К.Ферзалиев
