Колхозар тахьанмазни Ахцегь райондин агьалийрин, гьа жергедай яз ялцугъвийрин лапагар кьуьд акъудиз Азербайжандин къиш­лахрал куьч жезвай. Хипе­хъан­рихъ­ ­галаз пул къазанмишиз кIуртар цва­дайбур, пемпечияр, каркадал парчаяр храз алакьдайбур, кIвачин къапар цвадайбур физвай. Абурукай гзафбуру чпин хизанарни тухузвай.

Са кьадар ялцугъвияр, кIвал-югъ кутуна,  Азербайжанда амукь­на­.

Ялцугърин са шумуд хизан Геогчайда, Агъдашда, Къебелада, Кьудкьашенда, Варташенда, Зербада, Камарванда, Севреганда, Михликъавахда, Агъжакъебеледа ва маса чкайра яшамиш жезвай.

Чи хуьруьнвийрикай са шумуд хизан Геогчай шегьердиз куьч хьана. Абурун арада Абдурагьманов Мегьали бубадин гада Шагьисмаилан хизанни авай. Мегьали бубади хизанда 4 гада — Шагьисмаил, Усман, Абдурагьман, Идрис ва 3 руш — Мелек, Гуьл, Жамиле чIехи хьана­.

Шагьисмаилаз ругуд велед — Тагьир, Загьир, Магьир;  Адила, Раила, Тагьира авай.

Къе чун гегьеншдиз Загьиракай рахада. Ам 1934-йисуз Геогчай шегьерда дидедиз хьана.

Ам еке алакьунар авай зирек аял тир. Геогчайдин юкьван школа хъсан къиметар аваз куьтягьай ам Баку шегьерда Азербайжандин технический институтдиз гьахьна.

Инженервилин пеше къачунвай жегьил Бакудин лейтенант Шмидтан тIварунихъ галай машзаводдиз рекье туна. Ина ада вичин кIвалах мастердин куьмекчивилелай башламишна ва ахпа  заводдин директордин къуллугъдал кьван хкаж хьана.

Хъсан тешкилатчи тир пешекардал гуьгъуьнлай партиядин Ба­ку шегьердин  Нариманов райондин комитетдин сад лагьай секретардин къуллугъ ихтибарна.

Загьир Абдурагьманова вич кьиле акъвазнавай район республикада кIвенкIвечибурун жергеда туна.

ЧIехи агалкьунрай Нариманов район КПСС-дин ЦК-дин СССР-дин Министррин Советдин гъиляй-гъилиз къведай Яру Пайдахдиз ла­йихлу хьана.

Азербайжан Республикадин ва СССР-дин гьукуматри Загьир Абдурагьманован зегьметдиз еке къиметни гана. Ам Азербайжандин лайихлу инженер, Зегьметдин Яру Пайдахдин ордендин сагьиб тир.

Абдурагьманов Загьир Бакуда яшамиш жезвай Къулиева Тагиредал эвленмиш хьана. Абуруз 2 гада Загьир, Рауф ва кьве руш — Ираде, Эльмира хьана.

Загьиран чIехи гада Рауфа АР-дин президент Илгьам Алиеван ва  гьукуматдин хатасузвал таъми­нардай отделдин чIехид яз, генерал-майордин чинда аваз къуллугъзава.

2004-йисан 16-лагьай сентябрдиз Загьир Абдурагьманов пудкъанни цIуд йисан яшда аваз рагьметдиз фена.

2014-йисуз Эсед Къулиева “Азер­нешр” издательствода За­гьир Шагьисмаилович Абдурагьманован 80 йисаз талукьарна, уьмуьрдин рехъ ачухарзавай, санал кIвалахай юлдашрин, дустарин рикIел хкунар гьатнавай “Агь геже” (“Лацу лиф” тIвар алай чIехи ктаб акъуднава.

Загьир Абдурагьманов Мегьарамдхуьруьн райондин Советский хуьре яргъал йисара почтадин отделенидин начальниквиле кIвала­хай Абдурагьманов Тагъидин имидин хва я.

Тагъи буба “Лезги газетдин” даяхрикай сад я.

Сулейман Пашаев