Пешеяр гзаф ава, абурукай гьим хъсанди, халкьдиз менфят авайди ятIа лугьуз хьун регьят туш. РикIел Карл Марксан келимаяр къвезва: «Ви­чин кар, пеше дуьз хкягъай кас бахтлуди я». Чи къенин суьгьбет  гьа ихьтин касдикай — библиотекарь Рустамова Эльза Ханагьмедовнадикай я.

СтIал Сулейманан районда Алкьвадар Гьасанан тIварунихъ галай цент­ральный библиотекайрин къурулуш (ЦБС) кардик ква. Кьиблепатан Дагъус­танда хъсанбурукай сад тир адахъ хуьрера кардик квай 28 филиални ава.

— Тариф авун туш, гьакъикъат къалурун я: библиотекайрин къурулушда чпин пешедал рикI алай, агьалийрин къуллугъда хиве авай жавабдарвал гьисс авуналди акъвазнавай гзаф ксари кIвалахзава, — лугьузва ЦБС-дин директор Назила Шихбабаевади. — Абурукай яз завай Герейханован хуьруьн филиалдин заведующий Эльза Ханагьмедовнадин тIвар дамахдивди кьаз жеда. Адаз библиотекарвилин пешедай вичин руьгьдин таъминвал жагъанва лагьайтIа, зун ягъалмиш жедач.

Чун Э. Рустамовади кIвалахзавай библиотекадиз фена. Экуьвал, михьивал, къайда авай библиотека хуьруьн культурадин имаратдин кьвед лагьай мертебада кардик ква.

Малум хьайивал, Эльза Ханагьмедовнади вичин пеше дуьшуьшдай ваъ, рикIин эмирдалди хкяна. Къе ада и кардал дамахни ийизва.

— Гьеле школада кIелзавай йисарилай инихъ зи рикI ктабрал, абур кIе­лунал ала, — ихтилатзава Э. Рустамовади. — Идалайни гъейри, за библиоте­карвилин пеше хкягъунихъ маса себебни ава — зи диде Къурбанова Назият Разахановнади тамам 47 йисуз биб­лиотекадин заведующий яз кIвалахна. Чи кIвале гьамиша жедай ихтилатарни ктаб­рикай, библиотекада тухузвай мярекатрикай тир. Дидедин кар, пеше давамарунал зун шад я.

Э. Рустамовади 1992-йисуз юкьван школа, 1997-йисуз Дербент шегьерда «Юждаг» институтдин юридический отделение (юриствилин пеше къачуналди) акьалтIарна.

Библиотекада виле акьазвай «Да­гъустандай тир Гомер», «ХХ асирдин­ Гомер», «Советрин Союздин Игитар — да­гъустанвияр», «Афгъанистан — рикIера хуьн, чи тIал», «Зи рикI дагълара ава», Фейзудин Нагъиеваз талукьарнавай «ЧIалан, халкьдин тIал авай шаир», «Гъалибвилин рекьерай», «Чун куь невеяр я», «Халкьдин виридалайни къудратлу ва хци яракь чIал я» ва маса стендри, плакатри, выставкайри иниз къвезвай хуьруьнвийрин фикир чпел желбзава.

Эльза Рустамовади чаз лагьайвал, библиотекада, Ватан хуьзвайбурун йисаз ва ЧIехи Гъалибвилин 80 йисан юбилейдиз талукьарна, тухудай мярекатрин гегьенш план туькIуьрнава, адан бинедаллаз кIвалахни тешкилнава. Кьилди къачуртIа, ина «Выстоял. Сражался. Победил», «Дорогами нашей Победы» ктабрин выставкаяр ачухнава, библиотекадин кIелзавайбурухъ галаз «Дяве зи хизандин кьисметда», «Гъалибвилин май галай гатфар къвезва», «Инсандин кьисмет» (М. Шолохов), «Халис инсандикай повесть» (Б. Полевой) ва маса темайрай «Литературадин сятер» тухванва.

— Планда къалурнавайвал, ватанпересвилин месэладай гуьруьшар, акцияр, кIелзавайбурун конференцияр ва маса мярекатар чна алай йисан эхирдалди кьиле тухун давамарда, — лугьузва Э. Рустамовади.

Алай йисуз Эльза Ханагьмедовнадихъ библиотекада Ибрагьим Гьуьсейнован, Алибег Фатагьован, ашукь Нуьсретан, Ярагъ Мегьамедан, Арбен Къардашан яратмишунризни юбилейриз талукьарнавай мярекатар тухудай фикирни ава.

Библиотекада 7530-дав агакьна ктабар ава. Абур къайдадик кваз дезгейрал эцигнава. Эльза Ханагьмедовнади ктабар кIелзавайбурун кьадар артух хьун патални кIвалах тухузва. Мектебда кIелзавай аялрин арада ктабрал рикI алайбурун кьадар эхиримжи йисара иллаки артух хьанва. Санлай къачурла, алай вахтунда кIелзавайбурун кьадар 1010-далай виниз я. И рекьяй библиотека райондин хуьрерин филиалрин арада вилик жергейра ава.

— Библиотекадин кIвалах хъсан, кIелзавайбурун кьадар артух хьуник Герейханован АСП-дин кьил Руслан Алдырован, адан заместитель Селимат Гьажихановадин, хуьруьн 1-нумрадин юкьван школадин директор Мадина Гьажимурадовадин, хуьруьн агъсакъалрин Советдин ва депутатрин еке пай ква, — давамарзава ихтилат Эльза Ханагьмедовнади. — Гьар са карда куьмек гунай чна абуруз сагърай лугьузва.

Э. Рустамовадин намуслу ва бегьерлу зегьмет Дагъустан Республикадин культурадин министерстводин, Расул Гьамзатован тIварунихъ галай ­Да­гъустандин милли библиотекадин, СтIал Сулейманан райондин админист­рациядин, ЦБС-дин дирекциядин патай гьуьрметдин грамотаяр гуналди къейднава.

Чешнелу библиотекарь хьиз, Эльза Ханагьмедовна, жемиятдин крарин иштиракчи ва ферли веледрин дидени я. ИкI, 15 йисалай виниз Э. Рустамовади Герейханован хуьруьн юкьван школадин ва райондин диде-бубайрин комитетрин председателвилин, райондин Дишегьлийрин советдин членвилин везифаяр уьзягъдаказ кьиле тухузва.

Вичин уьмуьрдин юлдаш Назир Рус­тамовахъ галаз Эльза Ханагьмедовнади 3 веледдиз — кьве гададизни са рушаз — хъсан тербия гана. ЧIехи гада Рустам Санкт-Петербургда яшамиш жезва, Саидмегьамеда И. К. Яковлеван тIварунихъ галай, Жукован орден авай, Новосибирскдин милли гвардиядин кьушунрин институтда 3-курсуна ва руш Зульфияди 10-классда кIелзава.

Эльза Ханагьмедовнадиз ва адан низамлу хизандиз Герейханован хуьруьн жемятдин арада лайихлу гьуьр­мет ава. Писатель Къияс Межидова лагьайвал, дуьньядал гьуьрмет ва хушбахтвал къазанмишзавайди зегьмет я.

Хазран  Кьасумов