Сергей Меликова Украинада кьиле физвай махсус серенжемда телеф хьайи дагъустанвийрин хизанрихъ галаз гуьруьшар тухун давамарзава. Нубатдин гуьруьш 4-июндиз кьиле фена.
“Куь рухваяр, гъуьлер, бубаяр, стхаяр къе чун вири патал кьегьалар я. Абуру Ватандин вилик чпин хиве авай буржи намуслувилелди тамамарна. Халис итимри хьиз, чпин хизанар, хайи чил, халкь хвена.
Къе дагъустанвийри жуьреба-жуьре кьушунра къуллугъзава: Дальний Востокдилай гатIунна, Украинадихъ галаз авай часпардал къведалди. Гьина аватIани, абурукай гьар сада, чIехи бубайрилай чешне къачуна, чпин вилик эцигнавай везифаяр викIегьвилелди, кьегьалвилелди кьилиз акъудзава. И мярекатдал лагьайтIа, чна чIехи мусибатдикай вири дуьнья хуьнин рекье чанар къурбанд авур игитрин экуь къаматар рикIел хкизва”, — лагьана Сергей Меликова, гуьруьшдин иштиракчийрихъ элкъвена.
Украинада кьиле физвай махсус серенжемда телеф хьайибурун хизанриз государстводин патай гузвай куьмекрикай республикадин военный комиссар Дайтбег Мустафаевани зегьметдин ва яшайишдин рекьяй вилик финин министр Абдурагьман Магьмудова ихтилатна.
Дагъустандин Кьили телеф хьайи кьегьалрин экуь къамат эбеди авун патал шегьеррани районра кьиле тухузвай кIвалахрикайни хабар гана ва гьар са хизандин месэлаяр гьялунив къайгъударвилелди, жавабдарвилелди эгечIдайди къейдна.
Агьмед Магьмудов
