6-июндиз Дагъустандин Кьил Сергей Меликова республикада экономика ерилу авунин Оперштабдин заседание кьиле тухвана. Эхиримжи са шумуд вацра Дагъларин уьлкведин экономика цIийи шартIара вилик физва. Урусатдиз акси яз къецепатан жуьреба-жуьре уьлквейри кьабулнавай санкцийрин таъсир гьисс тавун патал гьам федеральный, гьамни регионрин дережадаваз карчийриз, жергедин агьалийриз куьмекдай алава серенжемар кьабулзава.
Оперштабдин заседанидал РД-дин Гьукуматдин Председателдин сад лагьай заместитель Руслан Алиева кризисдин гьаларин вилик пад кьун патал кьиле тухузвай мярекатрикай ихтилатна. Абурун арада, кьилди къачуртIа, экономика хуьнин мураддалди къанунрин къурулуш арадал гъун, муниципалитетрин бюджетрин дурумлувал мягькемарун ва бюджетдин кредитрин гьисабдай пулунин такьатар чара авуниз талукь месэлаяр ава.
Сергей Меликова “Телеграмда” авай вичин каналда хабар гузвайвал, сифте нубатда чкадал жуьреба-жуьре суьрсет гьасилзавайбуруз куьмекна кIанда. Карчийрихъ эцигунрин ва недай-хъвадай суьрсетдин промышленностда чкадин материалрикай менфят къачуз жедайвал, аялрин бахчайрив Дагъустандин карханайри арадал гъизвай тIямлу ва хийирлу суьрсет агакьдайвал, республикадилай къецепата Дагъларин уьлкведин жезмай кьван пара яржар машгьур жедайвал.
Сергей Меликован фикирдалди, туризм вилик тухунихъни еке метлеб ава. Оперштабдин заседанидал малум хьайивал, Дубки поселокда туризмдин цIийи кластер эцигдайвал я. Проект 7,4 гектардин майдандал кьилиз акъудда. Гьелбетда, ихьтин проектар тамамарун патал хъсан чирвилер, алакьунар авай пешекарарни герек жезва. Ахьтинбур гьазурун патал Дагъустанда кьилдин колледж ахъаюн фикирдиз къачунва.
“Дуьньяда гзаф дегишвилер кьиле физва. Чи макьсад а дегишвилерикай чи экономика патал хийир хкатдайвал авун я”, — гьисабзава С.Меликова.
Чи мухбир
