Туриствилин “Дербент-2000” центради тешкилуналди ва РД-дин туризмдин ва халкьдин художественный сеняткарвилерин министерстводи куьмек гуналди, и йикъара Дербент шегьерда чайдин сад лагьайди тир “Чайхана-2020” фестиваль кьиле фена.
Мярекат суварин шадвилерин къайдада, жуьреба-жуьре халкьарин майданар ачухна кьиле фена. Абурукай гьар садан патав зурба самовар гвай. Ина фестивалдин мугьманривай Индиядай, Китайдай, Япониядай, Уьзбекистандай, Азербайжандай тир, гьакIни Урусатдин чайдин, гьар жуьре ширинлухрин дад акваз жезвай. Мярекатдин иштиракчийрин ва мугьманрин вилик машгьур артистри ва ансамблри чпин гьунарар къалурна. “Гьелбетда, Дагъустандин Кьибледа хьиз чай маса санани гьазуриз жедач. И карда абур пешекарар я. Вири лап хъсан тешкиллувилелди ва шадвилелди кьиле фена. Ихьтин дережада мярекатар тухуз алакьунин мумкинвал къалуруни рикI шадарзава”, — къейдзава фестивалда иштиракай “Этнотревел” турфирмадин экскурсовод Зульфия Багъдаевади.
Минтуризмдин пресс-къуллугъди къейдзавайвал, ихьтин мярекатар инлай кьулухъ гьар йисуз тешкилда.
«Лезги газет»
