Дагъустандин газламишунин программада иштиракзавай, гьа са вахтунда кьезилвилер авай агьалийриз — ветеранриз, инвалидриз, гзаф аялар авай хизанриз, текдиз яшамиш жезвай пенсионерриз газдин тадаракар маса къачунин ва чилин участокдин къенепатан сетар туькIуьрунин карда финансрин куьмек гуда.
КIвалин къенепатан газдин тадаракар маса къачунихъ ва чилин участокдин къенепатан сетар туькIуьрунихъ галаз алакъалу харжияр эвез хъувун патал регионда яшамиш жезвай кьилди къачур категорийрин агьалийриз санлай гудай пулдин такьатрин гьакъиндай къарардал 6-апрелдиз къул чIугуна.
2021-йисан 21-апрелдилай кьулухъ икьрарар кутIунай ва газдик кутунвай кIвалерин иесийривай гила эвездин пул къачуз жеда. Республикадин бюджетда и макьсад патал тахминан 100 миллион манат фикирда кьунва. Талукь яз, куьмекдин пул кьезилвилер авай 1 агъзурдалай гзаф агьалийрив агакьун лазим я.
Санлай гудай пулдин куьмек тек са яшайишдин кIвализ авунвай ва 90 агъзур манатдилай гзаф тушир гьакъикъи харжийрай эвез яз гуда.
РД-дин Гьукуматдин Председатель Абдулмуслим Абдулмуслимова къейд авурвал, вичикай лагьанвай серенжемдикай республикадин агьалияр патал са кьадардин куьмек жеда ва ада газламишунин кIвалах тамамдаказ кьилиз акъудунин кардик йигинвал кутада. “Чахъ хуьрер тамамдаказ газламишунин план ава. Асул кIвалахар 2022-йисан эхирдалди акьалтIарун лазим я. КIвалахда гьалтзавай четинвал ам я хьи, са кьадар участокар ва я юзан тийидай эменнидин объектар законди истемишзавайвал гьисабдиз къачунвач. Гьаниз килигна, чна агьалийриз, программадин шартIаралди абурун участокрив газ агакьардайвал, ихьтин объектар законлудаказ регистрация авуниз, абуруз талукь документар къачуниз эвер гузва”, — лагьана ада.
РД-дин Росреестрдин Управлениди газламишунин кIвалах тамамдиз кьилиз акъудунин гьакъиндай арзаяр ганвай агьалияр патал чилин ва адал алай юзан тийидай эменнидин хсусиятчивилин ихтиярар тестикьарунин асант къайда туькIуьрнава.
И къуллугъ МФЦ-дин, госкъуллугърин сайтдин куьмекдалди ва я яшамиш жезвай чкадин агьалияр яшайишдин рекьяй хуьдай управленидиз атуналди тамамариз жеда. Эвездин пул газламишзавай кIвалихъ шумуд иеси аватIа, гьадалай аслу тушиз, тек са сеферда гуда.
Арза гудайла, агакьарна кIанда: кас вуж ятIа ачухарзавай документдин копия, и кас кьезилвилер авай агьалийрикай тирди тестикьарзавай документдин копия, кIвалин къенепата ишлемишдай газдин тадаракар маса къачунвайди тестикьарзавай документ ва мсб.
Къейд ийин, Дагъустанда социальный газламишуниз талукь яз къенин йикъалди 2017 арза ганва. Программадин сергьятра аваз 1100-далай гзаф кIвалер газдин сетрихъ галкIурнава.
«Лезги газет»
