Чи ватанэгьлияр — гьар сана

Несибди хайи чиливай яргъа авунвай ватанэгь­лий­рин арада  Ватандин абадвилихъ, хайи чIалахъ, милли ивиррихъ рикI кузвай ксар тIимил авач. Инанмишвилелди къейд ийиз жеда, лезги чил мергьяматлу, жумарт, ватанперес, инсанперес, чарадан дер­диникай хабар кьадай къилихрин, алакьдай куьмекар гуз гьамиша гьазур инсанралди девлетлу я. Ихьтин ла­йих­лу чешнейрикай сад Ахцегьрин хуьряй тир, Москвада яшамиш жезвай машгьур карчи, “Жилстрой” ООО-дин тешкилатчи  Нариман  Гъазалиевич  Гъазалиев  я.

Ам 1960-йисан 27-октябрдиз Ахцегьа адетдин, зегьметдал рикI алайбурун хизанда дидедиз хьана, гьавиляй адаз зегьметдин къадир чизва. Хуьре мек­теб­ куьтягьайдалай кьулухъ кьисметди ам Ашха­баддиз (Туьркмения) акъудна. 1976-йисуз Ашхабаддин политехнический институтдин промышленный ва гражданский эцигунрин факультетда заочнидаказ кIелна. Армияда хивевай буржи тамамарна хтайдалай кьулухъ жегьил пешекарди вичин фикирдик квай къастар кьилиз акъудунин камар къачуна. ИкI, а чIа­валай инихъ ам Москвада эцигунрин бизнесдал машгъул я.

Ахцегьвийрин арада ам чIехи меценат яз машгьур я. Гьакъикъатдани, Н.Гъазалиеван къаюмвилик кваз авунвай крарин, тухванвай мярекатрин кьадар гзаф я. Алатай вацран эхирда “Ахцегь-транзит” таксидин фирмади тешкилай лезги чIалан конкурсдин гъалибчийриз пишкешар гун патал 100 агъзур ма­нат чара авурдини Нариман Гъазалиевич я.

Дамах гвачир дагъвиди вичи ийизвай хъсанвилер халкьдин арада раижуник садрани кьил кутазвач. Гьавиляй за сад-кьве суал гайила, “заз жува авунвай крарикай ихтилатун гзаф къулайсуз я” лагьана. Гуьгъуьн­лай­ за ам хъсандиз чидай ахцегьвийривай хабарар кьуна.

Гьелбетда, инал жумарт ахцегьвиди авунвай са кьадар крар къейд тавуна жедач. 2006-йисалай ада Ах­цегьрин жуьмя мискIиндизни куьмекар гузва. 2006-йи­суз ада чара авур такьатрин куьмекдалди Ахцегьрин спортдин клубда подиумдал хъсан ринг туь­кIуьр­на­, ПТУ-дин боксдин зал герек тир тадаракралди таъминарна. Спортдин и жуьредал рикI алай, амма герек гьар са затI маса къачудай мумкинвал авачир бязи ксариз боксеррин бегьлеяр, кьилел алукIдай махсус затIар, капаяр ва маса затIар пишкешна. Ватандин къай­гъу чIугвазвай карчидин патай савкьатар къачун па­тал бокс­дай са шумуд сеферда акъажунарни тешкилна.

2008-йисуз Ахцегьа жуьреба-жуьре регионрин ­вишелайни гзаф спортсменрикай ибарат яз азаддаказ кьуршахар кьунай кьиле фейи вири Россиядин акъажунриз къаюмвал авурдини Н.Гъазалиев я. Сейли ватанэгьлиди райондин сергьятра волейбол, футбол, залан атлетика машгьуруникни вичин пай ку­таз­ва. Герек тир тадаракрин жигьетдай куьмекунилай гъейри, спортсменриз акъажунриз фидай мум­кин­­вални гузва. Гьелбетда, пагьливанарни агалкьунар гваз хквезва.

“Жегьилар спортдал желбун герек я, гьа чIавуз абур нагьакьан амалрин таъсирдикни акатдач”, — лугьузва Нариман Гъазалиевича.

Дарвилера гьатай инсанриз гузвай куьмекрин кьадарни чавай вири гьисабиз жедач.

2014-йисуз Ахцегьрин хуьре эквер хкахьунин месэла арадал атайла, хсуси такьатрихъ ада пуд трансформатор маса къачуна. Ихьтин къайгъударвилер къа­лурзавай Н.Гъазалиеван лайихлувилер РД-дин Кьили Гьуьрметдин грамотадалди къейдна.

Алай йисуз, сив хуьнин суварин вахтунда, ада хайи хуьруьн агьалийриз недай-хъвадай суьрсетар авай 500 чанта садакьа яз пайна, мектебда кIелзавай аялрин арада ватанпересвилин шиирар фасагьатдиз кIелунай тухвай конкурсдизни такьатрин жигьетдай къаюмвална.

Районэгьлийри, чирхчирри вичиз гьамиша алхишзавай Нариман Гъазалиевича и мукьвара вичин 60 йисан юбилей къейдна. И вакъиа адаз чнани мубаракзава. Къуй адахъ чандин сагъвал ва кIва­лах­да мадни еке агалкьунар хьурай!

К.Ферзалиев